Vawiin khan Agriculture Department (Crop Husbandry) chuan Agriculture Committee Room-ah Quarterly Review Meeting an nei a, he hun hi Agriculture Minister Pu H. Liansailova leh Agriculture Secretary Pu T.V. Fambawl ten hmanpui.
Agriculture Minister Pu H. Liansailova chuan tun 2nd Quarter liam ta hun chhunga Department hnathawh leh hmasawnna thlirlet tham an neih chu lawmawm a tih thu a sawi a. Hmasawnna lo lang chho tan ta te, rampum huapa ‘Agriculture Department leh Health Department-a hmasawn nasa ber State’-a min lo thlang te leh Central-in kan hnathawhte min hriatpui hi a lawmawm hle a ni a ti. Minister chuan kumin kum tira ‘Buh Thar Tam Kum’ kan puan kha a takin tunah a thleng chho mek a; Oil palm chungchang sawi langin Sorkarin theihtawp a chhuah a zarah hmasawnna tam tak awmin Godrej Company pawhin Factory bunna tur an tihfel thawkhat tawh thu a sawi bawk. Oil Palm hi a hralhchhuahna turah buai lo leh kan ram economy siamthatna tura hmun pawimawh tak luah a ni a ti bawk. Union Agriculture Minister Pu Sharad Pawar lo kal tuma Horticulture College pek min tiam pawh Chief Minister nen an bawhzui zel thu kalkhawmte a hrilh bawk.
He Quarterly Review Meeting-ah hian Director leh District Agriculture Officer ten Power Point Presentation hmangin an hmalakna hrang hrang – System of Rice Intensification, Improved Package of Practices, Improved Jhum, Farmers Field School, Oil Palm chungchang te an tarlang.
NLUP-a Department hmalakna hrang hrang te tarlan a niin tun dinhmuna Agriculture Department hnuaia beneficiaries awm dan chu : WRC-I = 3,325 families WRC-II = 2,016 families Oil Palm = 397 families Sugarcane = 322 families TOTAL = 6,060 families a ni.
Meeting-ah hian Farmers’ Identity Card chungchanga hmalakna kal mek te sawi lan niin tun kum tawp hma ngeia loneitute pek chhuah hman tura ruahmanna kalpui mek a ni. Thlasik chhunga District hrang hrang te hmalakna tur leh ruahmanna te District Agriculture Officer-ten an rawn tarlang bawk a ni.
