42MW hnukchhuak thei tur Tuivawl leh 38MW pe chhuak thei tur Tuirini Hydel Project bunna tura thawhhona thuthlung Memorandum of Understanding (MoU) chu vawiin khan Chief Secretary’s Conference Hall-ah Mizoram sorkar leh SPML Energy Ltd., Kolkata ten an ziak a ni. Thawhhona thuthlung-ah hian SPML Energy Ltd. aiawhin Chief Finance Officer Pu Lalit Kumar Khetan leh Mizoram sorkar aiawhin Chief Secretary Pu Vanhela Pachuau ten an hming an ziak a ni.

Chief Secretary Pu Vanhela Pachuau chuan inchibaina duhawm tak a ni tiin he hna kalpuina turah hian Mizoram sorkar chuan a theihtawp a chhuah ang a, chuti laiin tualchhung mite tan inhlawhna tam thei ang ber ruahman turin SPML hotute a chah a ni. SPML aiawhtu Pu Lalit Kumar Khetan chuan an Company chu liantham cheng vaibelchhe 1500 virvelna anih thu leh ramchhung state lian zawk Karnataka, Hmachal Pradesh leh Uttarakhand-ah te kawlphetha dehchhuah hna an thawh mek thu a sawi a. Mizoram chu kawlphetha indaihlohna state nia an hriat thin, kawlphetha hnianghnar state ni ngei tura theihtawp an chhuah tur thu leh tualchhung mite pawh a tam thei ang ber an rawih an tum dan te a sawilang a ni.