Kum kalta September thla a bultan National Institute of Information Technology, Aizawl Centre Office thar chu Pu Zalawma Building, Zarkawtah Parliamentary Secretary Pu Lal Thanzara’n a hawng.

Pu Lal Thanzara chuan zirna in tha tak, India ram mai nilo khawvel pawha langsar tham NIIT Mizorama hawn a ni chu lawmawm a tih thu a sawi a. Mizoram sorkar hmalakna a ramchhung zirna in tha tak tak, phai ram chauha awm tura kan ngaih, NIT, IIMC, NIIT leh a dang ten Mizo thalai tam zawk banphaka Mizoram chhungah ngei bu an khuar ta chu lawmawm a tih thu sawiin thangthar nula leh tlangval te an vannei hle a ni, a ti. Parliamentary Secretary chuan Industrial Training Institute, Aizawl chauhva awm thin pawh sorkar hmalaknain Saiha ah dah a ni tawh a, Polytechnic pawh Serchhip leh Saihaah te dah anih theih nan sorkar laipuiin phalna a pe tawh a ni, a ti bawk. Pu Lal Thanzara chuan Mizoram sorkar chuan thalaite hmakhua ngaiin zirna siam that kawng leh infiamna lamah theihtawp chhuahin hma a la a, tunah chuan Mizo te pawh khawvel kawtchhuahah hriatthama pholanin an awm mek zel a ni, a ti a. Zirna tha dawng tur chuan nu leh pa ten eizawnna ngelnghet an neih a tul zia hriain hawp khawp thar lo nu leh pa tam tak tan sorkar chuan NLUP hmangin rahbi a tuk sak mek zel a ni, a ti bawk.

NIIT hi Asia ram leh India ram pumah Information Technology zirna tha ber a ngaih a ni a. 1981 khan Gurgaon-ah din niin tunah hian ram chhung hmun hrang hrangah leh ram pawnah Centre 1200 an nei mek a ni. NIIT Aizawl Centre hi hmarchhak State a Center hrang hrang an neih zinga 29-na a ni.

NIIT Office thar hawnna inkhawm hi Pu PC. Vanlalhuma’n a kaihhruai a, Mizoram Legislative Assembly member Col. Z.S. Zuala pawh hawnna inkhawmah hian a tel a ni.