Govt. J. Thankima College leh CODNERC tangkawp buatsaih College zirtirtu leh zirlaite tana Human Rights Education thupui hmanga seminar ni 2 awh tur chu vawiin chawhma khan I & PR Auditorium-ah Education Minister Pu Lalsawtan a hawng.

Seminar hawnna inkhawm hi Principal J. Thankima College Pu Ramhmangaiha Ralte chuan a kaihruai a. Khuallian Pu Lalsawta chuan khawvel History kan enlet chuan mihring dikna leh chanvo palzut leh rahbehna rapthlak tak tak hmuh tur a tam hle a ni, a ti a. Africa atanga mihang tam tak America ramah bawih atan an tawlh luh te, Mizoramah ngei pawh remna thuthlung kan neih hma khan pawisawilo nunau tawrhna rapthlak tak te kha entirna lang sar zual te an ni tiin kum zabi 21-na hunah meuh pawh hian khawvel hmun hrang hrangah mihringte dikna chanvo rahbehna hmuh tur a la awm a ni, a ti. Education Minister chuan hetiang thupui khel tham, J. Thankima College leh CODNERC tangdunin a zirna hun tur an buatsaih chu thil tangkai a nih a beisei thu leh a bik taka zirlai ten thil tangkai tak an zirchhuah phah ngei a duh thu a tarlang a ni.

Seminar hawnna ah hian Mizoram University Prof. Srinibas Pathi chuan thuhma a sawi a. Seminar Organising Secretary Pu Zoramthangan seminar huaihawt dan tlangpui a tarlang a ni.

Vawiinah hian mithiam hrang hrang thlanchhuah Dr. Baharul Islam Laskar, Aizawl West College; Dr. T. Lalsangliana, Govt. Aizawl North College; David Khiangte, Govt. Lawngtlai College; Dr. C. Lalhmanmawia, Govt. Kolasib College; YP Singh, Mizoram Law College; Irene Lalruatkimi, Mizoram University leh Dr. Lallianchhunga, Mizoram University ten thupui thlanchhuah hmangin an thuziak an chhiar chhuak a. Dr. L. Sangkima, Principal, Govt. Aizawl College leh Pu Lalchamliana, Assembly Speaker hlui kaihhruaiin sawihona hun an hmang a ni.

Seminar ni 2 na naktuka chhunzawm leh turah chuan mihring dikna leh chanvo chungchang thupui hrang hrang thlanchhuahah Dr. Jangkhongam Doungel, Govt. Lawngtlai College; Dr. Lalhriatpuii, Mizoram University; Dr. JV Nunchunga, Govt. J. Thankima College; Dr. HTC Lalrinchhana, Sr. Civil Judge, Govt. of Mizoram; Pankaj Roy, Kamalanagar College leh Joseph Lalchhuana, SP, CID (Crime) an thuziak an chhiarchhuak ang a. Dr. Rualkhuma Colney, Principal, Mizoram Law College leh SK Ghosh, Director, CDC, Mizoram University te kaihhruaiin sawihona hun hman a ni leh ang.

Seminar kharna hun hi Parliamentary Secretary Education changtu Pu Chawngthinthangan hmanpui tura beisei a ni.