Mizoram-a a hmasa ber ni turin Aloe Vera Gel Processing Unit chu nimin November ni 2, 2011 khan Baktawng Tlangnuam-ah Pu K.S. Thanga, Parliamentary Secretary chuan hman theih turin a hawng. A
loe Vera Gel Processing Unit hawnna inkhawm, Baktawng Tlangnuam-a neih hi Dr. E. Saipari, Joint Director, Horticulture chuan kaihruaiin, khuallian Pu KS. Thanga chuan Baktawng Tlangnuam-a chengte chu sakhaw pakhat zuitu leh hotu pakhat neia awm-khawm an nihna ni lovin, taimakna leh tihtakzetna nena hna thawk thin an nihna chu sawrkarin a hmelhriat dan a ni a ti a, eng kawngah pawh taimakna, tumruhna leh rinawmna nena hna kan thawh chuan hlawhtlinna a awm zel thin a ni tiin, hlawhtlinna chhuanawm tak nei tur chuan engmah hi awlsam tak a awm ngai loh thu a sawi.
Khuallian chuan Mizoram hmun hrang hranga Farmers’ koh khawmnaah thalai hmuh tur an awm ngai loh laia Baktawng khuaah thalai hmuh tur an awm bik chu lawmawm a tih thu sawiin, he khuain hnathawhna kawnga hmingthatna an neih mek chu chhawm nung zel tur leh tuna an hlawhtlinna aia nasa zawk tawng tura tan la zel turin a chah a. He huna kalkhawmte chu an awmna hmun theuhah Mizoram tana entawntlak ni zel tur leh Mizoram timawitu nih tum zel turin a chah bawk.
He hunah hian Pu Lalhmangaiha, DHO Serchhip chuan Technical Report a pe a, he khawl bunna atan hian cheng nuai 23.50 hman a nih thu te, Technology Mission hnuaiah Rs. 3,50,000/- senga In pahnih sak a nih thu leh a khawlah hian Aloe Vera Gel Processing Machine leh Aloe Gel Concentration te a tel thu a sawi a. Tin he khawl enkawl tur hian Department mi pakhat leh Aloe Vera chingtu mi pakhat Gurgaon-ah training neihtir an nih thute leh a khawl hi Horticulture Mission for Northeast & Himalayan Region (HMNEH) sum atang lei a nih thu a sawi bawk.
Nimina he Khawl hawnna inkhawmah hian Pu Samuel Rosanglura, Director, Horticulture pawhin thu sawiin Aloe Vera chingtute tan sorkar chuan sum tam tak sengin khawl a bun tawh thu leh Aloe Vera chingtu ten an tihtur an tih ve a pawimawh thu a sawi a, Aloe Vera chin chu NLUP Trade-ah telh anih thu leh Aloe Vera kara chin theih turin Sawhthing Programme kalpui tum mek anih thu a sawi bawk. He hunah hian Pu Hunliannghaka, Chairman, Aloe Vera Growers Association pawhin thu a sawi bawk. He Society hnuaiah hian Aloe Vera chingtu chhungkua 45 an awm mek a ni.
