Youth Hostels Association of India (YHAI), Mizoram State Branch leh Department of Sports & Youth Services tangkawp buatsaih, National Trekking & Caving Expedition chu vawiin khan Art & Culture Minister Pu P.C Zoramsangliana’n Youth Hostel atangin a vailiam a. India ram state hrang hrang atangin mi 79 he Expedition atan hian an lo tel a ni.

YHAI National Trekking & Caving Expedition hi Mizoram-ah kum 2005 atang khan neih tan a ni a. Kum 3 chhung enchhinna anga kalpui a nih hnuin National Integration Programme pawimawh tak pakhat atan pawm leh, kum tin November ni 1 atanga tanin neih chhunzawm ziah a lo ni ta a. He programme hmang hian India ram state hrang hrang atangin member 1200 chuang Mizoramah hian an lo kal tawh a ni.

Trekking Expedition a kalte hian Youth Hostel, Luangmual atanga tanin Vaipuanpho, Ailawng, Hawlhhah, Nghalchawm, Sihhmui inkarah kalin zan khat zel an riak ang a. Ailawng ah hian Khuangchera puk an lut ang a. Camp site tinah Puan In tha tak eng emaw zat dah vek a niin blanket leh awngphah thlenga chhawp sak vek an ni a. Mizoram Adventure Club-a expert member ten trekking-a kalte hi an hruai a ni.