Vawiin khan Agriculture Department chuan NLUP chungchang ah sawihona pawimawh tak an nei a.  Pu C. Lalzarliana, Joint Director of Agriculture leh Technical Adviser, NLUP ni bawkin a kaihruai a, Pu P. Bhattacharjee, Director of Agriculture (Crop Husbandry) in Introductory Speech a neih hnuah Pu P.L. Thanga,IAS (Rtd.) Vice Chairman, NLUP Implementing Board in  Power Point Presentation a nei a. Miretheite khaichhuahna tura ruahman NLUP bul tan dan leh a thil tum te leh Sorkar-in kalpui zel a tum dan te, Beneficiary thlan dan tur leh enkawl zui zel dan tur te, NLUP hnuaia Committee hrang hrang – Village Level Committee, District Level Committee, Implementing Board leh Apex Board hnathawh dan leh mawhphurhna te chiang takin a hrilhfiah a. Line Department-te hnathawh dan tur leh an mawhphurhna te ngun takin a zirtir bawk.

NLUP hnuaiah hian Management leh Capacity Building atan Rs.71.39 Crore, Development Component-ah Rs.1272.80 Crore, Infrastructure Development atan Rs.1182.79 Crore, avaiin Rs.2526.98 Crore dil a ni a.  Hengte hi kawng hrang hranga mirethei chhanchhuahna tur atan leh Mizoram Development atan hman tur a ni.  Agriculture Department hi Nodal Department a ni a, chuvangin, Project Report siamah te, a umzui zelna kawngah pawh mawh an phur lian hle a ni.  He Department hnuaiah hian Activity pawimawh tak tak pathum a awm a, chungte chu – 1) WRC on Flat Land (Leilet Siam),  2) WRC on Slope Land (Terrace Siam),  3) Fu chin leh Oilpalm chin te hi an ni.  Leilung hausaknaa innghat eizawnna hi a nghet ber a, ro a tling ber a ni.  Chuvangin, tun atanga kum 5 a lo ral hnuah chuan NLUP hi ruahmanna ang leh dik taka thawh a nih chuan Mizoram-ah BPL chhungkua pawh an awm lo thei hial tur anga ngaih a ni.

NLUP zirhonaah hian Technology thar NLUP atana hman tangkai dan tur te, khaw hrang hrang atana NLUP Project siam dan tur leh loneitute tanpui dan tur uluk takin an sawiho bawk.