Vawiin 30th November, 2012 (Zirtawpni) khan Agriculture Department chuan an Committee Room-ah Oil Palm chungchang zirhona Workshop an nei.
He Workshop Pu Lalrinliana, Joint Director of Agriculture kaihhruaiah hian Dr. C. Lalzarliana, Director of Agriculture chuan Oil Palm chu Mizorama kan thlai chin pawimawh berte zinga mi a lo nih tak avangin a thawktute tu mah hi inthlahdah hman a ni lo. Company te nen thawhhona tha tak neih a pawimawh em em a, Department-a thawktute leh Company te inkarah inhriatthiam lohna engmah a awm tur a ni lo. Oil Palm chin chungchanga harsatna awm thei reng rengte chu uluk taka zir chian a, sutkian dan zawn zel tur a ni a ti.
He Workshop-ah hian Pu R.K. Nithanga, Deputy Director (Oil Palm) chuan Mizorama Oil Palm dinhmun Power Point hmanga entirin kumin 2012 chhung hian Mizoram pumah hectare 3711-ah Oil Palm chin thar a ni a, chumi atan chuan Oil Palm tiak 5,30,865 loneitute hnenah sem chhuah a ni a, kum hmasa lama chin tawhna te nen,tunah hian Mizoram pumah ram hectare 13,056-ah Oil Palm chin a ni tawh a, a thi leh ramsa ten an tihchhiat hnawhkhah tur ram hectare 3,808.50 a awm. Nakum 2013 hian ram hectare 6,500-a zauah Oil Palm chin thar tum a ni a, tun dinhmunah Mizorama Oil Palm Nursery hrang hrangah a tiak 10,26,731 a awm mek thu a sawi.
He Workshop-ah hian Oil Palm chinna District hrang hranga District Agriculture Officer te, he lam khawihtu Officer pawimawh te leh Partner Company – Godrej Oil Palm Ltd., Ruchi Soya Industries Ltd. leh 3F Oil Palm Agrotech Ltd. atang tein an lo tel a. Company te leh Department-a thawktute thawhhona tha zawk neih dan tur te, hlawhtling lehzuala Oil Palm chin dan tur te, a tiak sawngbawl dan chungchang te, sum leh pai enkawl dan chungchang te he Workshop-ah hian sawiho a ni.
