Vawiin khan Synod Conference Centre-ah 2010-2011 chhunga infiamna peng hrang hranga tithazual, Aizawl District huamchhunga mi te hnenah incentive cash award cheng nuai 45 chuang sem a ni a. Parliamentary Secretary, Sports Pu S Laldingliana chu khuallian a ni.

Khuallian chuan kum reilote chhungin Mizo thalai te nasa takin infiamna lamah an thang a, infiamna hmunhma ruangam lian tham dinah pawh kum li nga chhungin namen lovin Mizoram a thang a ni, a ti. Infiam mite tlukin nu leh pa te an pawimawh tiin a theih chin apiangah sorkar chuan sports tih hmasawnna turin hna a thawk a, infiammi te pawhin sorkar leh sports association-ah innghat mai lova, mahni zawn theuhva theihtawp chhuah leh zual turin Parliamentary Secretary Pu S Laldingliana chuan a fuih a ni.

Incentive Cash Award hlanna inkhawm hi Sports Secretary Pu R Lalvena’n kaihruaiin kalkhawmte lawmna thu a sawi a. Thu hmahruai sawitu Sports Director Pu Lalzirmawia Chhangte chuan infiammite chawhphurna tura sumfai pekna dan hi 2001 atanga hman tan a nih thu a tarlang a. He ruahhmanna ang hian infiamna chi hrang hrang khawvel huap, Asia khawmualpui huap, Commonwealth Games leh rampum huapa titha zual te hnenah sumfai pek thin an ni, a ti.

Tun tuma sumfai pek hi 2010-2011 chhunga mi niin, Mizoram pumah Rs 64,28,250 semral a ni a, Aizawl District bik tan hian Rs 45,78,000 discipline 21 a infiammi 423 hnenah sem a ni. Mamit-ah mi 30, Champhai-ah mi 55, Kolasib leh Serchhip-ah 17 ve ve, Lunglei, Lawngtlai leh Saiha District-ah mi 38 hnenah hlan a lo ni tawh bawk a ni.

Vawiina incentive cash award la tu zinga a langsar zual te chu 5th Commonwealth Kyorug Championship (Taekwondo) 2010 a Silver medalist Arjun Pandey, Armed veng hnenah cheng nuai 4 hlan a ni a; 5th Commonwealth Kyorug Championship (Taekwondo) 2010 veka Bronze medalist Vanlalruata, Laipuitlang chuan cheng nuai 2 a dawng a; King’s Cup World Championship (Sepaktakraw) 2010 a Gold medalist Lalhlimpuia, Sihphir chuan cheng nuai 1 a dawng bawk.