Students’ Self Support Union (SSU) in ni 3 chhung (28 - 30 Nov, 2012) General Assembly vawi 27-na Chanmari YMA Halla an hman mek chu, vawiin, a ni thumnaah Chief Minister Pu Lal Thanhawla chuan a hmanpui.

Chief Minister chuan SSU hi a ngaihpawimawh avangin, hmanlo chunga an assembly hi a kal sak a ni a ti a. Zir chunga mahni mamawh inphuhruk nana inhlawh thin an nihna hi Chief Minister chuan fakawm a ti a, zirlai ti tha zual 3 te hnena lawmman, cerificate leh pawisa fai Rs. 5,000/- theuh dawngtute chu zirlai entawntlak tak an ni tiin, a lawmpui rualin a chhuang hle a ni a ti a. Chief Minister chuan lawmman dawngtute chu Rs.5,000/- theuh a pek ve tur thu a sawi a ni.

Chief Minister chuan SSU hian college leh zirna school zawng zawngah branch nei thei vek se a duhthu a sawi a. Tun hun hi thalaite khawvel a ni tiin, Pu Hawla chuan khawvel thar siam sak turin zirna sang zawk nei turin leh infiamna lama hmasawn turin sorkar chuan theihtawp a chhuah reng a, hma pawh kan sawn viau a ni a ti a. Hetih lai hian kan ramah pawnlam mi ten kan thawh theih reng, kan thawh peih loh an thawk reng a, kan rama chambang tur sum, a vaibelchhe tel min lak sak reng a ni a ti a. Chuvangin ngaihtuahna thar hmanga, taimakna leh chhelna nen, khawvela hna zahawm ber, kuthnathawh thawk hreh lova, nakina pawnlam mite hnuaia kan kun loh nan, a tlai hmaa thalaite chu thangharh thuai turin uar takin a chah a ni.

Chief Minister chuan hnam zahawm leh hnam dingchhuak ni tur chuan ei leh barah te, sum leh paiah te kan intodelh angaih thu a sawi a. Hemi tur chuan taimakna, thawhrimna, chhelna leh tumruhna te a pawimawh a, chutiang ti thei tur chuan kan hrisel angai hmasa a ni a ti a. Chuvangin min ti hrisello theitu lakah kan fihlim angai a ni a ti. Thalaite hmakhua chu sorkarin a ngaihpawimawh thu sawiin, kaihhruaina dika an kalna turin Education Reforms Commission te din a ni a ti a, leilung hausakna haichhuahna lamahte leh a piahlama hna thawk thei turin, pawnlam mi koh luh ngai lo turin skill development lamah sorkarin hma a la mek reng a ni a ti a, zirna lamah pawh a tul tur subject te hawn thar zel a ni a ti.

Chief Minister chuan ami cheng zat chhutin Mizoram hi pawl hrang hrang tamna ber ni hiala a hriat thu a sawi a. Pawl ding thar reng rengin thawhlawm khawnin bul an tan a, a chhuanawm loh hle a ni a ti a. Zirlai pawl thenkhat pawh political party emaw tih mai tur an ni tiin, SSU chu mahni kea ding thei tura inkaihruai an ni chu a lawmawm hle a ni a ti a. SSU member pahnihkhat tan Lottery ah inhlawhna tur lo dap sak anih tur thu a sawi bawk a ni.

SSU hi kum 1985 kha alo ding tan a, thupuiah ‘zirlaite leh intodelh’ tih chu an hmang a. Mizoram district hrang hrang leh hmun dang dangah sub hqrs leh branch te an awm a. Aizawl chhung bikah chuan College 6 ah leh Higher Secondary School 13 ah branch an nei mek a ni.

Vawiin inkhawm hi SSU Vice President Zohmingsanga’n a kaihruai a ni.