Agriculture Department Officer-ten vawiin khan an Department Conference Room-ah 3rd Quarterly Review Meeting an nei a, Pu Lalram Thanga, IFS, Principal Secretary, Agriculture Dept. in a hmanpui.

Pu Lalram Thanga chuan Agriculture Dept.-in Quarterly a an hnathawh enletna hun an nei thin chu lawmawm a tih thu sawiin, hei hi district hrang hranga hnathawkte chinchang hriatpuina tha tak anih thu leh Department-a thawhhona tha tak pholangtu a nih thu a sawi a. District level-ah pawh chawlhkar hnih dan tala review meeting hi neih thin ni se a duh thu sawiin, hei hian hnathawh kawng hrang hrangah hmasawnna a thlen ngei a beisei thu a sawi bawk. Ei leh bar hlawkzawka tharchhuah a nih theih nan ruahtui khawl leh hman tangkai a pawimawh a ni, tiin.kanram leilung awmdan eninAgriculture Link Roadpawh tun aia tam zawk neih theih ni se a duh thu a sawi bawk. Retheihna umbo turin loneituten buh thar hlawk chi an chin a pawimawh a ni, a ti a. Loneitute chhawmdawlna leh thiamna hrang hrang hman dan chungchanga finchhuah fo turin Officer-te a chah bawk.

Dr. C. Lalzarliana, Director, Department of Agriculture (Crop Husbandry) chuan he hunah hian Power Point Presentation hmangin Agriculture-a Mizoram dinhmun a entir bawk.

He Review Meeting-ah hian District tina District Agriculture Officer-ten 3rd Quarter chhunga an District huam chhung theuha an hnathawh hrang hrangte entirin, tun Financial Year kal mek a an hnathawh tawh leh hmachhawpte an tarlang bawk a. Sawihona hun tha tak hman zui nghal niin hmachhawp hrang hrangte a hlawhtlin dan tur sawiho a ni bawk.

Agriculture Department Officer-te hian nimin khan Director Dr. C.Lalzarliana hovin Mizorama Oil Palm chin chungchang an sawiho a. He hunah hian Dr. R.K. Mathur, Principal Scientist (Plant Breeding), Directorate of Oil Palm Research, Pedavegi, Andhra Pradesh atanga lo kal chuan Mizorama Oil Palm a that thu sawiin hei hian Mizoram Economy pawh nasa taka a tihsan a beisei thu a sawi. India ramah Oil Palm Seed Garden paruk awmin Mizoramin Seed Garden pakhat a nei ve chu hmasawnna thlentu a nih ngei a beisei thu a sawi a, Department Officer leh Oil Palm chingtute training la pek zel an inhuam thu a sawi bawk.