Nikum lamah ruahtui tlak tlem vanga Champhai District chhunga loneituten buhbal an thar tlem vangin Champhai District Agriculture Department chuan loneitute hmakhaw ngaiin kawng hrang hranga tanpuina a ruahman mek a. Champhai District chhunga loneitute pualin kuminah leilehna khawl (Power tiller) 99 man tlawm zawka a leitir dawn bakah luipui tui pump-na tur Pump Set 188 man tlawm zawkin a leitir dawn bawk.
Champhai DAO Pu Lalthanzuala chuan luipui kam leilet a Buh leh bal chingtute tan bik a ruahmanna hi sian a nih thu sawiin, nikumah mamawh huna ruahtui a tlak tlem vangin buhbal ching thei lova loneitu tam tak an awm vangin an harsatna sutkian anih theih nan luipui tui lakna atan heng Pump Set te hi ruahman anih thu a sawi bakah, nikumah leilehna hmanrua ber Lawi chu hrileng vanga a thih deuh vek vangin Leilehna khawl hi ruahman anih thu a sawi bawk.
Nikum aiin kumin ah ruahtui a tlak chhiat zawk a hlauh thu sawiin, DAO chuan kumin hi Champhai District-ah June thla chhunga ruahtui dawn chhiat ber anih theih thu leh loneitute mamawh ber hun June thla bikah vawiin thleng in ruah 19.89mm chauh a tlak thu a sawi a. Champhai District a loneitute chu buhchi phun tur kui tiak rihlo tura loneitute chu chahin, DAO chuan eng buh chi pawh ni 25 aia upa lova phun vek turin loneitute a chah bawk.
Rastrya Krishi Vikas Yajona (RKVY) Scheme hnuaiah Leilehna khawl company hrang hrang (Schrachi, Shifeng, Greaves Co.) siam leina atan sorkarin Rs 75,000/- a tumsak dawn a. He Scheme hnuaiah hian loneitu Leilehna khawl mamawh mi 300 zet diltu zingah mi 99 hnenah pek a ni thung a. All Mizoram Farmers' Union (AMFU) pawhin kumin hi buhbal thar kumah a puan bawk vangin nasa tak tan lak tum a ni.
National Food Security Mission (NFSM) leh RKVY Scheme hnuaiah Champhai District loneitute tan tui pump-na khawl, Khawnvartui, Diesel leh Electric Current hmang (Usha leh Elysian Co.) siam chi hrang hrang leina atan sorkarin Rs 10,000/- a tumsak dawn bakah Nylon tui pipe 75mm a lian, Meter 5 a sei chu tlawn khat a man chanve (Rs 370/-) a lei theih turin a ruahman sak bawk.
Agriculture Department chuan Champhai District chhunga leilet zau hrang hranga chin turin phairam buhchi tha a sem kual mek bakah thlaichi venna hlo a sem chhuak nghal bawk a. Chinai thi leh Chemical Fertilizer a pek chhuah bakah loneituten harsatna an neih apiang District Agriculture Department hotute hnenah hriattir thin turin a chah bawk.
