Mizoram puma thingphun beihpui thlakna kum 1999 atanga neih thin chu kumin pawh hian Mizoram hmun hrang hranga hman a ni leh a. He ni hi Mizoram hmun dang rualin vawiin khan Kolasib District ah pawh  hman niin ICDS Complex Thingdawl ah a huhova thing phunna neih a ni. Kolasib District a Green Mizoram Day 2015 puala programme chu Parliamentary Secretary Pu Hmingdailova hovin Highway Restaurant, Thingdawl-ah hman a ni.

Pu Hmingdailova Khiangte chuan kalkhawmte chu Green Mizoram Day chibai bukin Green Mizoram Day hi programme dang angin a Ni a zawhin, a programme hi a tawp ve lova, he Ni hman hnu hian Green Mizoram Day ina a tum ber, thing phun te chawl lova enkawl zui chu ah in tan chauh thin a ni, a ti a. Ram ngaw chereu nasa in khawvel sik leh sa a inthlak danglam dan thusawiin he thilah hian Mizoram hi kan bang bik lova, tunah chuan khua a lum chuan fan te hman a ngai tawh a, kan tui hna te a kang chho a, leimin a tam a, chuvangin heng zawng zawng lakah in veng tur chuan mitin hian thin phun kan uar a, kan thing phun te kan enkawl zui a tul takzet a ni, a ti.

Parliamentary Secretary chuan thingkung leh ram ngaw te hi mihring nunna hnar ‘lifeline’ pawimawh tak anih thusawiin he Ni a thingphun zawng zawng te chu an thing phun te ngaihsaka enkawl zui turin a chah a.  Green Mizoram Day kan hman chan te hre renga ram ngaw chereu veng tur leh tuihna humhalh turin an ngaituahna, an tha leh an theihna te hman theuh turin he hunah Kolasib Districta office hrang hranga atanga kalkhawmte chu a chah bawk a ni.  

Green Mizoram Day programme hi Kolasib DC Pu Jitender Yadav chuan kaihruaiin mihring nun a thingkung leh ngaw a pawimawh dante a sawi a. Programme hmanpuitu dang Conservator of Forests, Northern Circle Pu V Lalfala chuan Saw Mill Rules siam danglam chuan Mizoram sum leh pai dinhmun a siam that theih bakah Mizoram economy a chawikan thei a rin thu te a sawi.

Green Mizoram Day hman dan chungchang report tu Kolasib Divisonal Forest Officer, Pu Saurabh Sharma chuan kum ruk kalta khan Koalsib District chhung ah thing tiak 55,000 phun a ni tawh thu leh nikum khan thing tiak 4100 phun a nih thu te a report ah a tarlang a. Kolasib SP Pu C Lalzahngoa chuan lawmthu sawiin hun a khar.

He hunah hian Kolasib Forest Division hnuaia ram kang veng tha khua chawimawina Village Level Fire Prevention Award dawngtu khaw pathum – Hortoki (pakhatna), Serkhan (pahnihna) leh Mualkhang (pathumna) te chu Parliamentary Secretary hian lawmman leh certificate a hlan a. Lawmman pakhatna hian cheng 50,000, pahnihna in cheng 30,000 leh pathumna in cheng 20,000 a keng tel. High School zirlaite tan Ram kang ven chungchangah thuziah inziahsiakna buatsaiha lawmman late pawh lawmman hlan an ni bawk.  

Programme hman zawhah hian Parliamentary Secretary leh mi pawimawh dangte hian Highway Restaurant compound chhunga thing an phun a, Department hrang hrang te hian a huhovin ICDS Complex, Thingdawla thing an phun bawk a ni.

Green Mizoram Day pual hian 05 Riders(Bullet bike khalhtu) ten Awareness Drive an nei bawk.