Vawiin khan RNTCP Hall, Chandmari Lunglei-ah Malaria do kawnga hmasawn zel nan National Vector Borne Diseases Control Programme(NVBDCP) chungchang training Lunglei District huamchhunga Medical Officer te pualin neih a ni a, he hunah hian Dr.C. Zarzoliana, Jt.Director(Mal), State Programme (VBDCP) leh a team ten zirtirna an pe a ni.

Dr. C. Zarzoliana chuan tihdamna ringawt ni lo, mipuite Malaria natna laka invenna ngai pawimawh tura zirtir a tul thu a sawi a. Lunglei District hi Malaria Case tamna hmun (endemic zone) a ni a, Medical Officer zawng zawng ten mahni awmna hmun theuhah, Malaria tih tlem a nih theihna turin tan la a, theihtawp an chhuah zel a pawimawh a ni, a ti.

He training hi Dr. VLMS. Dawngliana, CMO Lunglei chuan kaihruaiin Malaria do kawnga mithiam bik ten thupui hrang hrang hmangin Medical Officer kalkhawm te hi zirtirna an pe a. Dr. C. Zarzoliana State Programme Officer chuan ‘ Role of Medical Officer in Malaria Control’, Dr. SR. Ngurchamliana Medicine Specialist, Civil Hospital Lunglei - ‘Diagnosis & Treatment of Malaria’, Dr. RSV. Vanlalruati, Micro-Biologist, Civil Hospital Lunglei - ‘Morphology & Life Cycle of Malaria Parasite, Supervision of Laboratory Services’, Esther Lalawmpuii PSCM Consultant - ‘Logistic & Supply Chain Management’, Deborah Lalpuii, State IEC Consultant - ‘Role of IEC/BCC in Malaria Control’ chungchang sawiin, B.Krawsengmawia, Statistical Assistant chuan Reports & Records tih chungchang a sawi bawk.

He hunah hian Lunglei District chhunga Malaria dinhmun leh harsatna awm thei leh hmasawn dan turte sawiho a ni a, Lunglei District huamchhunga Medical Officer te an tel tha hle a ni.

Kumin January-April thla thleng khan, Lunglei District huamchhungah thisen exam tawh zawng zawng zat mi 9737 awmin, heng zingah hian 609 malaria hrik pai hmuhchhuah a ni a; Malaria Pf hrikpai 552 leh Malaria Pv hrikpai mi 57 an awm. Kum liam ta 2014-ah khan, thisen exam zat mi 43419 zingah Malaria hrikpai 4627 an awm a, Malaria Pf 4210 leh Malaria Pv hrikpai mi 417 an awm bawk a, Malaria vanga thi mi 4 an awm a ni.