Agriculture Minister Pu H. Liansailova leh Parliamentary Secretary Pu K.S. Thanga te ruahmanna leh hmalakna bawhzuiin Agriculture Department chuan Director Dr. C. Lalzarliana kaihhruainain vawiin chawhnu dar 2:00 khan Video Conference neih a ni. He hunah hian District tina DAO leh Officer te bakah Directorate atangin Officer pawimawh tak tak te an tel.
He Video Conference-ah hian buh thar tamna tur atana Department ruahmanna hrang hrang uluk taka sawiho a ni. System of Rice Intensification (SRI) chungchangah District hrang hrangte an an hmalakna tur chin leh a chhawr tangkai turte an neih dan, zau engzatah nge an kalpui tih te leh an hmalakna hrang theuh te sawiho a. District tinah DAO leh Field Officer ten theihtawp chhuahin a hmunah ngei enfiahin hna an thawk tih he hunah hian sawi lan a ni. SRI hi hlawk lehzuala buh thar theihna a nih avangin zirtirna leh a taka thawh pawh tun aia nasa lehzuala kalpui ni se tiin Director chuan DAO te a chah zui bawk.
Improved Package of Practices, Improved Jhum leh Hybrid Rice Technology chungchang pawh sawiho a ni a. Buh Thar Tam Kum 2012 hman leh mekah leilet leh lo atanga hlawk zawka buh thar chhuak thei tura Department ruahmanna kalpui zel a nih dan chu tha tawkah ngaiin loneitute nena inpawhtlanna leh inlungrualna tha tak awm chu lawmawm an ti hle.
Fertilizer chungchang pawh Video Conference-ah hian sawiho niin District hrang hrang ten an stock position an report bakah loneituten a hun takah an mamawh ang tawk an neih theih zelna turin theihtawp chhuah zui zel ni se an ti.
Rannung leh hrik, natnaten buh an tihchhiat laka invenna tur atana Department ruahmanna lo siam lawk tawh Pest Surveillance pawh tun thla chhung ngeia District tinah Team ruatte theuhin fang chhuak leh se, DAO-ten a tul ang angin lo buaipui bawk se tiin an inchah bawk.
Oil Palm chungchang sawiho a niin tunah hian Seedlings pek chhuah mek zel a ni a, Oil Palm chinna District hrang hranga Seedlings pek chhuah theih tur an neih dan leh an sem chhuah tawh zat te inhrilh hriat a ni bawk. Oil Palm hi hriak nei thlai zinga chin hlawk leh hriak pai tam a nih avangin ram sum pai pawh chawi kang thei tura ngaih leh beisei a ni a, a chinna ram pawh zauh zel tura ruahmanna kalpui mek a nih thu leh sorkar laipuii pawhin Oil Palm chin tih tihpuitlin leh tihhmasawn zel a tum dan te, Director Dr. C. Lalzarliana chuan a sawi bawk. Tun dinhmunah Oil Palm rah (Fresh Fruit Bunch) 878.78 MT hralh tawh a ni a, Oil Palm Mill pawh din thuai tum a niin Kolasib District-a Bukvannei-ah August thla tawp hian Oil Palm Mill sakna tur lungphum pawh Chief Minister Pu Lal Thanhawla’n a phum dawn a ni.
NLUP chungchangah Agriculture Department hnuaia hmalakna hrang hrang, WRC, WRC-II, F leh Oil Palm te pawh sawiho a ni a, District tina an thawh dan leh verification an neih dan te inzawtin uluk taka vil chhunzawm zel turin an inchah bawk.
Sorkar-in loneitute hamthatna tur atana ruahmanna a neih hrang hrang te sawiho niin zawhna leh chhanna hun te hman a ni bawk. Mizoram Sorkar-in loneitute chawikan leh dawmkan a tumnaah Department-a thawktute pawh hnathawk theia a siam avangin lawmawm an ti a, thahnemngai lehzual turin Dr. C. Lalzarliana chuan Officer leh thawktu dangte a chah zui nghal a ni.
