Ramchhung hmun dangte rualin President thar thlanna turin vawiin khan Mizoram Assembly-a MLA 40 te chuan tluang takin Assembly House Committee Room-ah vote an thlak fel ve ta. Vote awm zawng zawng te hi chhun dar 12:15 vel khan thlak fel vek a ni.

President thlanna tura vote thlak hi chawhma dar 10 atang khan tan niin Sorkar Laipui atanga Observer lo kal, Pu Rajiv Kumar IAS Joint Secretary, Ministry of Finance leh Assistant Returning Officer pahnih Pu Ngurthanzuala, Assembly Secretary leh Pu Vanlalnghena Additional Secretary, Mizoram Assembly Secretariat te chuan an vil reng a ni. Vawiina vote thlaktu zingah Brig. T Sailo chu a hmasa ber a ni.

Ballot Box hi Aizawl Treasury Strong Room-ah venhimna khuah tak hnuaiah dah luh niin naktuk ah Delhi thlenpui tur a ni a, vote tla te hi July 22 khian chhiar tur a ni.

Mizoram Assembly MLA pakhat zel vote hlut zawng chu vote 8 a ni a. Rampuma vote awm thei zat chu 10,98,882 a ni.