No.1063/2020-2021 

Lawngtlai, Tomir thla ni 13, 2020: COVID-19 hri leng avanga inkharkhip kalpui mek laia kut hna thawktute mamawh leh dinhmun zir chiang tur leh Mizoram sawrkar flagship programme Socio-Economic Development Policy (SEDP) hnuaia Agriculture Development Board hma laknate puangzar a, ram intodelh nana kut hna thawh pawimawhzia zirtir tura thawk chhuak, Agriculture Development Board (ADB)Team 1 member-te chuan vawiin khan Lawngtlai tlawhin, Agriculture leh a kaihhnawih department official-te, tlawmngai pawl, VC Association leh kut hna thawktu pawl ai awhte chu DC Conference Hall-ah an thut khawmpui.

He thut khawm hi Lawngtlai District Agriculture Officer (DAO) Pu J. Rokima'n a kaihruai a. Team 1 Leader, Mizoram Agriculture Development Board member Pu Lalropuia Pachuau leh Team 1 member dang Pu Lalsangliana Hnamte te'n thu an sawi bakah, kal khawmte atangin thu sawi ngaihthlak niin, sawi hona hun hman a ni a. Agriculture Extension Officer Pi Vanlalngaii'n lawm thu a sawi bawk.

Team 1 Leader Pu Lalropuia Pachuau chuan khawvel chanchinah hripui leng chu tamin a zui thin tih sawiin, COVID-19 hri leng pawh chuan khawvel economy nghawngin, ei leh bar kawngah pawh harsatna a thlen ngei a rinawm tih a sawi a. He harsatna lo thleng thei laka lo inveng lawk tur hian Mizoram sawrkar chuan theih tawp a chhuah mek zel thu sawiin, kut hna thawktute'n an harsatna an thlenna tur (Farmer’s Helpline) 0389- 2311160 leh 0389-2328564 buatsaihah Thawhtanni atanga Inrinni chawhma dar 10 atanga chawhnu dar 2 thleng biak pawh theih reng a nih thu a sawi a, hei hi hmang tangkai turin kut hna thawktute chu a chah.

Tuna ADB hnuaia Team an intirh chhuah chhan bulpui ber chu COVID-19 hri leng a kian huna ramin ei leh bara harsatna a tawh loh nana mipuite rilrua intodelh duhna tuh a nih thu sawiin, Mizoram leilunga kan thar chhuah ve theih reng thilte chu pawn lam atanga lak luh ngai lo tura kan intodelh theih nan he hri leng hian harh tharna (green revolution) rawn thlen se tih chu an duhthusam leh an tum a nih thu a sawi.

Pu Lalropuia Pachuau chuan Mizoram chu thlai chi leh buh chi-ah kan intodelh lo hle a, kan mamawh ang a chi khawl thiam a tul tih sawiin, he hri leng vanga bahra khura lut leh hnahnem ring kan awm loh nan kut hna thawh leh thlai chin lama harh thar a, ei leh bar leh sum hman danah pawh inrenchem thiam a tul thu a sawi.

Pu Lalsangliana Hnamte pawhin COVID-19 hri leng karah SEDP hnuaia hma lakna a kal reng thu sawiin, agriculture-ah hmabak eng tak a awm thu a sawi ve bawk.

Lawngtlai DAO Pu J. Rokima'n COVID-19 hri leng vanga kut hna thawktute leh department-in harsatna an tawh a tar lan danin, a phurh velna kawnga harsatna a awm avang leh a ching ngai lo ching thar an awm avangin buh chi leh thlai chi indaih lohna a nasa a. Department chuan sawrkar hotute ruahmanna leh Horticulture Department te nen tang tlangin a theih ang angin buh chi leh thlai chi hi an sem a. Vaimim ei chhetu fall army worm inlar leh tanin, hemi laka kut hna thawktute tanpui turin department chuan theih tawp an chhuah mek a. Lei tha leh rannung thahna hlo duh khawp hmuh tur a awm lo leh oil palm chingtute thar chhuah seng leh hralh khaihlak te chu an harsatna tawh langsar zual a ni a. Oil palm hi Ruchi Soy Industries Ltd chuan a pangngai anga lei leh tan tawhin, hei hian kut hna thawktute pawh a chhawk hle a. Harsatna dang dangte pawh sawrkar ruahmannain a chin fel dan kawng ngaihtuah zel a ni.

ADB Team te hian ei leh bara intodelh tura tan lak a tul thu tlangaupuiin, thlai chia intodelh pawh tihmakmawh a nih thu an sawi a. SEDP hnuaiah ram acre 2500 (tin 2500 hmun)-a zauvah vaimim chi quintal 174 chin mek a nih thu leh hemi bakah hian kut hna thawktute mamawhna avanga vaimim chi quintal 200 chuang sem a nih thu an sawi a. SEDP hnuaiah vek hian ram acre 1400-a zauvah be lam chi (pulses) chin tum a nih thu an sawi bawk. Vaimim ei chhetu fall army worm chungchangah, vaimim a la tet lai chuan rannung thahna hlo (insecticide) hmang lo va, uluk taka vai a, kuta thah mai a that thu leh mi thiamte rawn fo a pawimawh thu an sawi a. PM-KISAN leh PM-KISAN Mandan Yojana hnuaia kut hna thawktute'n hamthatna an neih chungchangte pawh an sawi bawk.

He thut khawmah hian ei leh bara intodelh tura hma lak tulna kawng hrang hrangte sawi ho niin, kut hna thawktute mamawhte pawh ADB Team member-te hnenah hian thlen a ni a. Agriculture Development Board chuan Lawngtlai District Village Council Association chu mipui zirtirna kawnga hma an lakpuina atan tanpuina pawisa fai an hlan bawk.

Thut khawm zawh hian Team member-te chu Siaha panin an chhuak leh nghal a ni.