No.1062/2020-2021

Saitual District chhunga awm, chhungkaw 373 chen mekna khua, Hliappui chuan Manipur leh Myanmar ramri hrula duty thin khaw hrang hrang panga - Khawkawn, Mimbung, Hrianghmun, Teikhang leh Kawlbem khua te tana vehbur khawna an pawisa thawh tlingkhawm, Rs 50,000/- chu vawiin 13.5.2020 khan Ngopa SDO(Civil) & BDO Pu Vanlaltanpuia kutah an hlan.

Thilpek hlantu, Hliappui VCP leh Task Force Committee  Chairman ni bawk Pu H. Lalthaliana chuan thu sawiin, "He kan pawisa fai pek hi ramri hrul khua ten tangkai taka an hman kan beisei a,  thilpek tam tham pe thei lo mah ila ramri hrula duty mek te hnathawh kan hriatpuina a ni," a ti a. Tunhnaia an khawtlangin rial nasa tak tla avanga chhiat an tawh chungchanga khaw thenawm mipuiten pawisa fai leh tha leh zung an sen dan te; sorkar hotu lam atang te, tlawmngai pawl leh kohhran hrang hrang hnen atang tea tanpuina an dawn dan an hriatreng thu leh an lawmzia a sawi a, a bik takin bialtu MLA Pu L. Thangmawia chunga an khaw mipuite an lawmzia a sawilang a, tun tumah hian tanpuina hlan tura thawkchhuak an nih rualin, tunhnaia chhiat an tawh chunga lawmthu sawi tura kal an nih pah thu a sawi bawk.

Ramri hrula awm khaw 5 te aiawha pawisa dawng tu Ngopa SDO (Civil) & BDO Pu Tanpuia chuan, "23.4.2020 a rialin chenna In 268 zet a tihchhiat sak khua, Hliappui mipuiin Covid-19 do nana ramria duty te tan sum heti zat an rawn thehchhuak thei chu fakawm a tih thu sawiin, heng pawisate hi khaw 5 te hnenah a inzat theuh, Rs 10,000/- zela semrual a ni ang," a ti a.

Rialin an chenna in nasa taka a tihchhiat avanga an rilru manganna pawh a reh fel hman rih lo hial ang tih tur hun leh anmahni zawk pawh tanpui an ngaih em em hunlaia midangte tana an rawn luangchhuak hi Hliappui khaw mipuite an fakawm tak zet a, khaw dang te pawhin entawn ngei se a duh thu a sawi bawk.

He thilpek hlanna hunah hian Hliappui khawtlang aiawhin Hliappui Village Task Force Committee vice chairman leh Kawlkulh Group YMA Secretary ni bawk Pu K.Lalthansanga,  MHIP Secretary Pi Lalhruaitluangi, YMA secretary Pu PC Lalrotluanga leh Pu B.Lalengliana MUP treasurer ten VCP hi an tawiawm a ni.