N0.1061/2020-2021

Lawngtlai, Tomir thla ni 13, 2020: Vawiin khan Lawngtlai District Information & Public Relations Officer Pu C. Lalhruaitluanga chuan a office-ah Mizoram Journalists' Association (MJA), Lawngtlai District member-te kawmin, COVID-19 hri leng mek dona kawnga journalist-te chanvo leh mawhphurhna chungchangah infuih tharna hun an hmang.

DIPRO Pu C. Lalhruaitluanga chuan Lawngtlai journalist-te'n COVID-19 hri leng chungchanga mipui zirtirna leh thu thar puanzar kawnga hma an lakna chu chhuanawm a tih thu sawiin, mipuiin an thu an ngaihchan thup an nih avangin chanchin puanzar kawngah fimkhur leh zual tura chahin, tul lova mipui tichi-ai thei thu theh darh kawnga fihlim a, sawrkar hma lakna ngaichanga hna thawh tum turin a chah a. Thu thar fawm khawm tura an chettlatna hmun chu hri kai hlauhthawnawmna hmun a nih thin avangin theih tawpa inveng fimkhur turin a chah bawk.

Lawngtlai District MJA te chuan Directorate of Information & Public Relations atanga advertisement an hmuhte a bill la tura Aizawla kal zel a harsat avanga Director hnena kawng ngaihtuahsak tura an ngen chungchangah DIPRO hnena lak theih tura Director-in ruahmanna a siamsak chu lawmawm an tih thu an sawi a. COVID-19 vanga inkharkhip (lockdown)-in an ei zawnna a nghawng zingah chanchinbu mite chu a tuar nasa berte zinga mi an ni tih sawiin, mipuiin an thu an ngaihchan ve reng avangin an hna erawh an chawl tak tak thei lo va, hetih lai hian chanchinbu mite intunnunna pawimawh tak advertisement chu sawrkar atangin hmuh tur a awm mumal tawh lo tih an sawi a. COVID-19 chungchanga mipui hriat tur puanzar kawngah a theih chin chinah sawrkar chuan chanchinbu chu hmang tangkai zual se an duh tih an sawi.

Lawngtlai DIPRO leh District MJA te hian COVID-19 hri leng mek dona kawnga sawrkar hma lakna leh Lawngtlai District dinhmun te an sawi ho va. Mipuite'n harsatna an tawh hrang hrangte bengkhawn a, a tul anga district thu neitute finchhuah leh thawhpui a tul thu te an sawi.