No.7886/2020-2021

Aizawl, 23rd March, 2021 : Vawiin khan sawrkar flagship programme SEDP hnuaia din Agriculture Development Board chu an Chairman, Agriculture Minister ni bawk Pu C. Lalrinsanga hovin SAD Conference Hall, MINECO-ah an thukhawm a, Draft Policy and Operational Guidelines for Collective Farming in Mizoram leh Draft Policy on Procurement of Rice through Modern Rice Mill in Mizoram te thlirlawkna neih pahin an sawiho a ni.

Draft Policy and Operational Guidelines for Collective Farming in Mizoram  hi loneitute Farmer Producer Organization/Company (FPO/FPC) anga telkhawm a, buh leh bal chin kawnga hma lak dan tha zawk, hlawk zawk leh tunlai zawk te awlsam taka an zirho theih nana kawng sial sak tumna a ni a.  Draft Policy on Procurement of Rice through Modern Rice Mill in Mizoram hi Mizorama Rice Mill kan neih huna loneitute tana hlawk tura tangkai taka kan hman theihna atana ruahman a ni. Kolasib district-a Pangbalkawnah darkar khata buhhum metric ton 5 her thei tur khawlpui bun mek a nih thu leh kumin kum laihawl hi chuan hman tan a nih theih beisei thu meeting-ah hian report a ni.

Board Chairman Pu C. Lalrinsanga chuan Collective farming hi kan duhthusam anga kan kalpui thei a nih chuan SEDP hnuaia ruahmanna tihhlawhtlinna pawimawh tak a nih dawn bakah, loneituten awmze nei zawk leh mumal takin, tuna kan kal dan aia hlawk zawkin ke an pen kan beisei a ni, a ti.

Meeting ah hian Agriculture Development Board Chairman (Agriculture Minister ni bawk) Pu C. Lalrinsanga, Vice Chairman Pu H. Biakzaua MLA, Special Secretary Pu J.Hmingthanmawia, Agriculture (R&E) Director Dr H. Saithantluanga leh member dang te an tel a ni.