No.7887/2020-2021

Health Minister Dr R.Lalthangliana chu Dhaka, Bangladesh atanga a rawn haw hnuin March ni 22 leh 23 khan Kolkata-a Mizoram Sawrkar empanelled hospital hrang hrang - AMRI Salt Lake Hospital, BM Birla Hospital, Apollo Gleneagles Hospital,  RN Tagore Hospital,Medica Superspeciality Hospital leh Tata Medical Centre hotute nen Mizoram House-ah inkawmhona hun an hmang.

He meeting pawimawh takah hian Mizo damlo, rethei te te, tawng lamah pawh harsatna nei, heng hospital pantute harsatna lo hriatsak a, hriatthiamna sang tak nen lo enkawl a, a bik taka lo ngaihven leh tanpui turin Health Minister Dr R.Lalthanglianga chuan hospital thuneitute a chah a. Mizo damlo vanduaia thi an awmin state pawn lamah inphum kan duh loh tlangpui avangin an ruang rang taka Mizoram lama thawn a nih theih nan Hospital lamin Death Certificate pekchhuah kawngah, tun aia awlsam leh rang zawka pechhuak thin turin Hospital thuneitu hrang hrangte a chah.

Health Minister chuan Mizo damlo heng hospital pantute lo dawnsawn leh enkawl kawngah harsatna a awm a nih chuan Mizoram sawrkar aiawh, Joint Resident Commissioner hnenah hriattir a, amah kaltlanga chinfel thuai dan ngaihtuah zung zung thin turin hospital thuneitu hrang hrangte chu a hrilh a. Mizo damlo, a bâ a inenkawl thei (credit facility nei) leh neilo te hnenah, Mizoram sawrkar sum dinhmun hriatsak a, an natna kaihhnawih lem loah chuan investigation tihsak lo tur leh fimkhur zawk a, a tul chin chiah ti thin turin a chah bawk.

Mizo Junior Doctor te tân specialised areas/ discipline hrang hrang - Cardiology, Neurology, Oncology(Cancer) leh a dangte ah short term training course buatsaih sak thin turin Dr.R.Lalthangliana chuan hospital thuneitute a ngen a. Heng Hospital liante hian an Doctor thiam rualte Mizoram ah rawn tirin, ni hnih ni thum awh emaw Medical Camp/Special Clinic rawn buatsaih turin a ngen. Minister chuan Mizoram Healthcare Scheme hnuaia inziaklutte tan inenkawlna sum bithliah sâ (fixed) a nih avangin, natna tam tak inenkawlna a khuh zo thin lova. Chutiang hunah chuan Hospital lam ten a theih dan kawng awm ang ang hmanga damlote tanpui dan tur kawng lo dapsak thin turin a chah a. Kolkata-a Mizo damlo, damdawi in hrang hrang pantute tan tun atanga hun reilote ah Male Nurse rawn dah a nih tur thu leh Mizo damlote tanpuina kawngah tha taka lo thawhpui turin Health Minister Dr.R.Lalthangliana chuan hospital hrang hrang thuneitute hi a chah bawk a ni.

Hospital thuneitute chuan an hnena Mizo nurse thawk te taimakzia leh felzia Health Minister hnenah hian an sawi a. Mizo nurse te lo chhawr zel tur Dr R.Lalthangliana ngenna chhangin anni pawhin lak zel an duh thu an lo hrilh a ni. Hospital hotute nena an inkawmnaah hian Joint Resident Commissioner, Kolkata Mizoram House leh House official ten an tawiawm.

Minister hian vawiin khan US Consulate General Pi Patti Hoffman chu a office ah kawmin, zofate USA a hna thawk tur emaw lehkha zir turten VISA hmuh kawnga harsatna an tawh te a sawipui a, hriatthiamna thui tak nena lo pui thin turin a chah.

Vawiin tlai vek khan Mizoram House, Salt Lake, Kolkata ah Kolkata Mizo Welfare Assn hruaitute nen Minister hi an inkawm a, Kolkata a Mizote hian Covid-19 vanga an harsatna tawh lai leh hun danga a buaipuina zawng zawng avangin Minister hnenah lawmthu an sawi a, Mizo Welfare te hian zanriah an buatsaih sak bawk a ni.