2776/2022-2023
Sahmulphah thla ni 23, 2022: Lai Autonomous District Council (LADC)-in kum sawmnga a tlin (Golden Jubilee) lawmna hun, CYLA Playground Lawngtlaia buatsaih chu vawiin khan a ni hnihna hun hman chhunzawm a ni a. He hunah hian Lawngtlai East Bialtu MLA, Agriculture Development Board Vice Chairman Pu H. Biakzaua chuan telpuiin, Lawngtlai Bawrhsap Pu Amol Srivastava chuan khual zahawm niin hun a hmanpui bawk.
Lawngtlai Bawrhsap chuan LADC huam chhunga cheng zawng zawngte LADC Golden Jubilee lawmpuina hlanin, India Danpui 6th Schedule hnuaia Lai hnamin chanvo ṭha tak a chan chu a hlutzia hre renga LADC hmasawn nana thawk zel turin a chah a. District Administration-in LADC nen thawh hona ṭha tak a neih thu sawiin, Lawngtlai District leh mipuite hmasawn nan thawh hona ṭha chhawm nun zel a nih a beisei thu a sawi a. Golden Jubilee Celebration Committee te'n kum tir aṭanga hlawhtling taka jubilee lawmna hun hrang hrang an buatsaih theih avangin a lawmpui thu sawiin, duhsakna a hlan nghal a ni.
He hunah hian LADC Chief Executive Member Pu V. Zirsanga chu Khuallian a ni a. LADC-in kum 50 a tlin chu LADC huam chhunga cheng zawng zawng tan hlimna leh lawmna tur hun a nih thu sawiin, LADC kal zelna turah politician, official, kohhran, pawl leh mipuite ram leh hnam damna tur ngaihtuah chunga pheikhai rual taka thawh ho a pawimawh tih a sawi a. Hnam vanga LADC sawrkar awm a nih angin ram leh hnam humhalhna kawnga ṭan lak chu hna pawimawh hmasa bera neih a ṭul a ni, a ti.
LADC Golden Jubilee lawmna ni hnihnaah hian Baptist Church of Mizoram (BCM), Lawngtlai Area-a Executive Secretary Rev. H. Lalthlamuana chuan hunserh a hmang a. LADC-a Education (P/S) changtu Executive Member Pu L. Daniala'n inlawmna thu sawiin, LADC Chairman Pu VL Hmuaka'n thu a sawi bawk a. CYLA ai awhin General Secretary Pu Joseph Lalhmingthanga Chinzah chuan thu a sawi bawk.
He hunah hian Mizo Hmeichhe Insuihkhawm Pawl (MHIP), Sub-Headquarters Lawngtlai te'n hnam inthuamna chi hrang hrang entirna (costume parade) buatsaihin, CYLA, Pang Cultural Association, Middle School zirlaite leh Bawm Cultural Troupe te'n hnam lam chi hrang hrang an entir a. C. Lalhruaitluangi hnen aṭangin recitation ngaihthlak niin, BCM Choir Lawngtlai Area leh zaithiam hrang hrang zai ngaihthlak a ni bawk a. Phawngpui Photographers Association te huaihawtin hmeichhia leh naupang tan traditional dress contest buatsaih a ni bawk a. Tlai lamah concert hun hman chhunzawm niin, LADC-a Deputy Chief Whip Pu H. Lalmuansanga'n lawm thu sawiin hun a khar a ni.
Vawiina hun hmanah hian LADC-a member ni lai leh member hluite leh an chhungte, LADC officer leh staff-te, state leh central department official-te, political party, pawl leh kohhran hrang hrang ai awhte, zirlai naupangte leh mipui ṭhahnem tak an kal khawm a ni.
Attachment
- Loading attachment...
