2777/2022-2023
Aizawl the 23rd November 2022 : Vawiin khan Aizawl City Local Council Association (ACLCA) chuan an General Assembly vawithumna chu Aizawl Vanapa Hall ah an hmang a. Deputy Chief Minister Pu Tawnluia chu khuallian niin Aizawl Mayor Pu Lalrinenga Sailo chu khual zahawm a ni.

Pu Tawnluia chuan Local Council member-te chu Aizawl khawpui inrelbawlnaa mipui hne hnai ber, a bulthut leh a lungphum pawimawh an ni, a ti a. Tualchhungah hna an ngah a, khawtlang mipui tan an pawimawh em em a, hei hi Sawrkar pawhin a hmuh hmaih loa, a hriatpui a ni, a ti. State Sawrkar chuan thuneihna a hlawma hum lovin a zau thei ang bera semzai chu tha a ti a, khawpui hmasawnna sum leh pai dawnthlengah pawh Municipality a hmang a ni, Deputy Chief Minister chuan a ti a. Tun hmaa Village Council ni thin kha khawpuiah chuan AMC kaihhruaina hnuaiah Local Council tia leh a ni a, Lunglei lamah pawh Lunglei Municipal Council din tura ruahmanna siam fel vek tawh niin CEO leh a staff te pawhin hna an zawm tawh tih a sawi a, chutiangin nimina Cabinet Meeting pawhin LMC inkaihhruaina tur a siam te a pawm a ni, a ti. SEDP chungchang sawiin Deputy Chief Minister Pu Tawnluia chuan Mizoram hmun hrang hrangah a thawhkhatna sem mek a ni a, a thawhhnihna sem a nih leh theih nan a dawngtuten hma an la em tih endik mek a ni, a ti a. A nih tur ang taka SEDP sum te hman a nih theih nan an huam chhung theuhah Local Council ten lo vil se a duh thu a sawi a. Sawrkar kum tharah a dawngtu tur chhungkua thlan belh a ni ang a, a dawng tawh sa te tan pawh dawn belh zel tur a la awm dawn a, SEDP hi a kal reng dawn a ni, a ti bawk.

Aizawl Mayor Pu Lalrinenga Sailo pawhin thu sawiin Local Counil inkaihhruaina dan ennawn a tul thu te, thuam that leh thuam chak a nih theih nan Aizawl City Local Council in ruahmanna a siam te pawh a lo hmuh tawh thu a sawi a, “AMC chuan in kut ke vuahkim kan tum a ni”, a ti. AMC office building-a Local Council Office siam chungchangah Mayor chuan building sak mek a nih thu a sawi a. AMC revenue atangin Local Council member te tan an thla 6 lawmman pek remtih a nih tawh thu a sawi bawk.

Programme hi ACLCA Vice President Pu V.Lallungmuana’n a kaihhruai a. President Pu H.Malsawma’n kalkhawmte lawmna thu a sawi a, General Secretary Pu Vanlalhruaia’n an pawl hmalak dan report a pe a ni.