2778/2022-2023
Aizawl the 23rd November 2022 : Vawiin khan Mizoram Election Department huaihawtin Assembly House Annexe Conference Hall, Aizawl-ah rualbanlo voter-te tan ‘Special Enrolment Camp for Persons with Disabilities (PwDs) Voters’ neih a ni a. He hunah hian Mizoram PwD Commissioner Pi Vanlaldiki Sailo chu Khuallian niin Mizoram Jt. Chief Electoral Officer Pu David L. Pachuau, Mizoram State SVEEP PwD Icon Asst. Prof. Lalbuatsaiha leh Election officials ten he Special Camp-ah hian thusawiin hun an hmang a ni.

‘Special Enrolment Camp for PwDs’ Asst. CEO Mizoram Pi Laldinfeli kaihhruaiah Khuallian Mizoram PwD Commissioner Pi Vanlaldiki Sailo chuan ECI leh Election Department hmalaknain rualbanlo voter-te tan ‘Special Enrolment Camp’ buatsaih a nih chu lawmthu a sawi a. Rualbanlote chanvo humhalhna ‘The Rights of Persons with Disabilities Act 2016’ (RPwD Act 2016) dan tha tak a awm thu leh State Commissioner, PwD chuan Mizoram State chhungah sorkar leh mipuiten he dan ‘RPwD Act 2016’ hi an zawm tha em, a nihna anga kalpui a ni em ti bawhzui leh vil hna a thawk a ni a ti. Hei bakah hian rualbanlo ten an mamawhna apiangah theih anga hmalakpui turin an inpeih reng thu a sawi bawk. Kum 2023 kum tawpah Mizoramin inthlanpui a hmachhawn leh dawn a, India khua leh tui nih angin mi tinin an tih tur chu vote thlak a ni a, chuvangin Election Departmet-in tun atangin PwD zawng zawngten thlamuang taka vote an thlak theih nan hna an thawk mek hi an ngai hlu hle tur a ni a ti. Pi Diki Sailo chuan theih nise electoral roll-ah an hming zawnah ‘PwD’ tih leh a rualban lohna category ziah lan nise, inthlanna buaipuitute tan a awlsam phah anga, hei hian PwD tan hamthatna a neih ngei a rin thu a sawi bawk. Kum 2021 February ni 2 atanga November 2022 (kum 1 leh 9 months) chhunga rualbanlote tana an hmalakna thenkhat tarlangin sorkarin District tina Deputy Commissioner Chairman-na hnuaiah District Level Committee on Disability a din a; February - March, 2021 inkarah district 3 tlawh hman niin Department tin officer-te nen RPwD Act 2016 hnuaia rualbanlote chungchanga hmalakna leh kal zel dan tur sawipui a nih thu sawi a. April 2021 atangin Covid lockdown vangin district dang an tlawh thei ta lova, DC-te puihna azarah district 7 atangin rualbanlo data mumal tak an dawn thu a tarlang. Sorkar Department tin leh College tinah Grievance Redressal Officer (GRO) ruat an ni a, meeting hmasa ber pawh October ni 7, 2022 khan neih a ni a. Ministry of Social Justice & Empowerment (MSJE) hmalaknain Mizoram University Campus-ah Centre for Disabilities Studies (CDS) pawh kum tharah a function dawn tawh a, Mizo thalai rualbanlohna chungchang course zirna tur MZU ah an nei dawn ta a ni a ti.

PwD Commissioner Pi Vanlaldiki Sailo chuan thu as awi zelnaah Sport & Youth Service Department-ah Sports activities hrang hrangah PwD-te an tel tam theih dan tur ngaihtuah turin ngenna an siam thute, Aizawl City Bus-ah ‘Reserve for PwD’ vohbikte pual Sticker tar vek a nih tawh thute, Secondary leh Elementary school zirlai bu siamtu MBSE leh SCERT ah low vision tan Large Print leh Braille textbook mitdel tan siam leh hman theih a ni dawn tih thute, PwD kal tha theilo scooty three wheeler-a kalte tan tlanloh ni awmlo (no plying day) Traffic SP hnenah dil sakin mi 17 tan special permit pek an nih thu leh Health & Family Welfare Secretary hnenah Medical Board ten disability certificate a pek thinah multiple disability pek chungchang uluk zual turin ngenna siam a nih thute a tarlang a ni. Kumin December, 2022 thlaah rualbanlo tana thawh hlawkte chawimawina ‘Mizoram State Award for Empowerment of PwD’ sem a nih dawn a, hei hi Mizorama a vawi khatna tur a nih tur thu a sawi bawk.

Mizoram Jt. CEO Pu David L. Pachuau pawhin thusawiin PwD-te tan a bik taka hun siamah mi thahnem tak an rawn tel theih avangin lawmthu a sawi a. Election Commission of India chuan inthlanna huapzo, felfai leh thianghlim buatsaih hi a tum ber a ni a, chumi tihlawhting tur chuan hma nasa takin a la mek a, a bik takin kum upate leh rualbanlote ngaihsak kawngah te, inthlan nia vote an thlak ve ngei theihna turin ruahmanna nasa tak a lo siam tawh thin a ni a ti. ECI chuan ni 4 November, 2022 khan India ram pum huap PwD Icon-te tan National Conference a huaihawt a, state hrang hrang atanga PWD Icon ten thu an sawi a, Mizoram aiawhin State SVEEP PwD Icon Asst. Prof. Lalbuatsaiha;n thu a sawi tih a tarlang a. ECI thuchhuak angin rualbanlote tan polling station tinah ramp siam a ni a, a mamawh tan wheelchair pawh ngaihtuah sak niin, Mizoramah pawh PwD voter-te buaipui turin polling station tinah volunteer-te dah an nih thu Jt. CEO chuan a sawi a. Hmun thenkhatah phei chuan PWD voter-te vote thlak tura an kal leh haw lam hruai turin lirthei pawh ngaihtuahsak an ni thin a ni a ti. Tunah hian a vawi khatna atan khawhmuh lama harsatna neite tan Braille EPIC siam sak turin ruahmanna kalpui mek a ni a, Braille EPIC mamawh an awm a nih chuan tunkar chhung hian in-report turin a chah nghal a ni. Pu David L. Pachuau chuan nakkuma inthlanpui lo awm turah pawh vawiina Special Camp-a lo kal khawmte chu vote thlak ngei turin a chah a. ECI ruahmannain kum khatah vawi 4 electoral roll-ah a inziah luh theih tawh dawn a, tun huna kum la tling chiahlo an awm a nih pawhin, nakkum chhunga kum 18 tling dawn a nih phawt chuan vote nei thei turin inziak lut thei tawh a nih thu a tarlang a. Taksa leh pianphunga rualbanlohnate chhuanlamah hmang mai lovin, inthlan niah chanvo pawimawh tak an nei tih hriaiin an chanvote hlenchhuak theuh turin a ngen a, inthlan kaihhnawiha tupawhin mamawh nei an awm phawt chuan Election Department te an inhawng reng a ni tih a sawi bawk.

Mizoram State SVEEP PwD Icon Asst. Prof. Lalbuatsaiha pawhin thu sawiin tunhma chuan inthlannaa vote thlakna kawngah hian rualbanlote tan a hranpaa ruahmanna siam a ni ngai lova, amaherawhchu United Nations Convention On The Rights Of Persons With Disabilities, 2006 leh The Rights Of Persons With Disabilities Act, 2016 hnuaiah chuan taksa leh rilru lama rualbanlohna hrang hrang neiten awlsam leh mumal zawka vote an thlak ve theih nan sawrkarin ruahmanna hrang hrang a siam ta a, Election Commission Of India hmalakna hrang hrang avangin tunah chuan inthlannaah rualbanloten awlsam leh mumal zawkin vote an thlak ve thei tawh hi hmasawnna ropui tak a ni a ti. India khua leh tui kum 18 tling tawh electoral roll-a hming chuangte chuan vote khat theuh an nei a, chuvangin, mi hausa leh mi rethei leh rualbanlote vote hlut lam a inang vek a ni tiin vawiina Special Camp chhimtu PwDs zawng zawngte chu electoral roll-ah inziak lutin inthlan awm turah pawh vote thlak theuh turin a chah a ni.

Vawiina Special Camp-ah hian Pi H. Vanlalruatfeli, Programmer Election Department chuan Voter Awareness Presentation a nei a, PwDs engemawzatin electoral roll-ah an hming an ziak lut bawk a ni.