2779/2022-2023
Sahmulphah thla ni 24, 2022: Lawngtlai East bialtu MLA, Agriculture Development Board Vice Chairman Pu H. Biakzaua chuan tukin zingkar khan Lawngtlai-III Health Clinic Centre thar a hawng.

Lai Cultural Centre-cum-Auditorium, Lawngtlai-III-a Health Clinic Centre thar hawnnaah Pu H. Biakzaua chuan Chief Minister leh Health Minister te'n hriselna ngai pawimawhin, Mizoram chhung, a bik takin district hnufual Lawngtlai District angah te health sector lam tihchangtlun a nih theih nan theih tawp chhuahin hma an la tih a sawi a. Sawrkarin mipui mamawhna hriaa Lawngtlai District chhungah health clinic centre 26 lai a taka kalpui tura ruahmanna a siam chu lawmawm a tih thu sawiin, he'ng health clinic centre-te hi a tam zawk chu hawn leh a taka kalpui mek a nih tawh thu a sawi a. A tirah building awm sa hmun thenkhat tih loh hmun tam zawkah building sak nan leh thawktu rawih nan MLA Fund hman a nih thu sawiin, tunah chuan SEDP sum hmangin health clinic centre eng emaw zat bul tan leh enkawl a nih thu a sawi.

Pu H. Biakzaua chuan Lawngtlai-III-a health clinic centre hawn chu khawtlangin hriselna kawnga hma a sawnna tur mellung pawimawh tak a nih thu sawiin, hawn chhan ang taka tangkai taka hmang turin veng chhung mipuite chu a chah a. Health clinic centre chu khawtlangin neitu rilru pu-a an enkawl tur a nih hria a, veng chhung mi thahnem ngaite'n thilpek chi hrang hrang - lehkhabu chhuar, khum, dawhkan leh thil tul dang dang an pe chu lawmawm a tih thu a sawi a. A phuisui zel nan leh a changtlun zel nan thawktute mamawh leh harsatna ngaihven a, tha taka thawhpuia thlawp tlat zel turin veng mipuite a chah nghal a ni.

Health Clinic Centre thar hawnna inkhawm hi Lawngtlai Chief Medical Officer Dr LP Malsawma chuan a kaihruai a. Lawngtlai-III VC Vice President Pu H. Siamhmingthanga'n hunserh hmangin, lawm thu sawina hun a hmang bawk a. Lawngtlai-III bialtu MDC Pu T. Lalengmuana'n Lawngtlai-III Health Clinic Centre hawn a nih thu-ah Mizoram sawrkar leh Bialtu MLA chunga an lawm thu a sawi bawk.

Lawngtlai-III Health Clinic Centre hawnnaah hian ADB Vice Chairman Pu H. Biakzaua hi LADC-a executive member, office holder leh MDC eng emaw zat leh MNF District Headquarters hruaitute'n an tawiawm a. He hunah hian health department lama thawktute leh Lawngtlai-III khawtlang hruaitu leh mipui eng emaw zat an tel a ni.

Lawngtlai-III Health Clinic Centre hi Lawngtlai-III Branch YLA enkawl, Lai Cultural Centre-cum-Auditorium building hnuaiah dah lailawk niin, thawktu health worker pakhat, helper pakhat leh ASHA pakhat an awm a ni.