2780/2022-2023
Aizawl 24th November 2022: Vawiin khan Commerce & Industries Development Board Vice Chairman leh Tuirial Bialtu ni bawk Pu K. Laldawnglian'n N. Chaltlang Vengchhak Volleyball Court a hawngin, khuallian a ni.

Khuallian Pu K. Laldawngliana chuan thu sawiin MLA Fund atanga siam Volleyball Court hawn theih a nih chu lawmawm a ti a. Kan ram ruihhloin min run a, thalai te tha za tihtur nei si lovin ruihhloah an tal lut leh mai thin, hengte hi infiamna hmunhma tha kan neih loh vang pakhat a ni thei a; thalai te tha za han hrikthlakna tur infiamna hmunhma tha tak vawiin ni-ah kan neih belh hi a lawmawm takzet a, infiamna leh ruihhlo hi thil kalkawp thei a nih loh avangin N.Chaltlang thalai te pawh ruihhlo laka kan fihlim chho zel nan he Volleyball Court hi chhawr tangkai turin a chah a. Khuallian chuan vantlang thil dimna chang kan hrelo thin hi thil veiawm tak a ni a, vawiina Volleyball Court hawn pawh hi kan zavaia ta a ni a, a chhiat a thatah kan vaia mawhphurna a ni tih hria a, uluk taka enkawl theuh turin a chah bawk a ni.

Khuallian Pu K.Laldawngliana chuan Tuirial Constituency chhungah rotling engmaw zah kan din chho mek a, MLA Fund atanga sak Kawnpui Medical Officer Office Cum Laboratory Building hawn a nih tawh thu a sawi a, hemi bakah Khamrang Futsal Ground hawn a nih thu sawiin; Zanlawn Public Playground pawh hawn mai tura buatsaih mek a ni tiin hmabak tam tak chhawpchhuah zel a nih bawk thu a sawi.

Volleyball Court hawnna hi Pu Vanlalruata'n kaihruaiin Cultural Show entir niin YMA, VC, GSA aiawh te a tang thusawi ngaihthlak a ni bawk.