2781/2022-2023
24.11.2022: Vawiin khan Aizawl E-II bialtu MLA & Minister of State Pu Robert Romawia Royte chuan Khuallian niin Dawrpui Sikul Kum 100 tlin lawmna a hmanpui a, Dr H.Lalthlangliana, School Education Director chu Khualzahawm a ni.

Khuallian Bialtu MLA Pu Robert Romawia Royte chuan Centenary pual lungphun a hawng a. Thusawiin Dawrpui Sikul lo dintute leh thawktu hluite leh thawk mekte chu fakawm a tih thusawiin zahna chibai a buk a. Dawrpui Sikul chu zirna in hlu leh pawimawh a nih bakah pawl hrang hrang ten khawmpui nan leh hnam pum huap rorelna pawimawha an hman thin a nih thu a sawi a, Dawrpui veng tan mai ni lo, rampum huap tana hmun hlu a ni a ti.

ICT Minister chuan Dawrpui Sikul (PS Section), MS Section leh Higher Secondary School te chu Computer set 1 theuh pein Dawrpui School-ah NIELIT IT Centre din a tum thu a sawi bawk. Bialtu Minister chuan Dawrpui Sikul Zirtirtute leh Zirlaite chu theihtawp chhuaha tang sauh sauh tura fuihin Centenary chibai bukin duhsakna a hlan a ni.

He huna Khualzahawm Dr H.Lalthlangliana, School Education Director chuan Dawrpui Centenary Souvenir tlangzarhin sorkar sikul duh loa Dawrpuiin Deficit system an thlang zawk hi an tifuh a ni tiin mipuiin zirna atan mawhphurhna an lak a tul a tih thu a sawi.

Dawrpui Sikul PS section-ah hian zirtirtu 8 leh zirlai 53 awmin; Middle Section-ah zirtirtu 10 leh zirlai 74 an awm mek bawk. Higher Secondary Sikulah hian Lecturers 12, non teaching staff 3 leh zirlai 263 an awm a ni.

He Function hi Board Chairman Dr Upa Zarzoliana’n a kaihhruai a, Dawrpui bial Pastor F.Lalhmingthanga'n hun serh hmangin Dawrpui Branch YMA Zaipawl zai bakah items dang tam tak nen hlim takin hun hman a ni a, tlaiah centenary ruai theh a ni.