2758/2022-2023

Sahmulphah thla ni 22, 2022: Lai Autonomous District Council (LADC)-in kum sawmnga a tlin (Golden Jubilee) lawmna hun, CYLA Playground Lawngtlaia buatsaih chu vawiin a ni khat ni khan Lawngtlai East Bialtu MLA, Agriculture Development Board Vice Chairman Pu H. Biakzaua chuan Khuallian niin a hmanpui.

Pu H. Biakzaua chuan Lai hnamin mahnia ro inrelna LADC sawrkar a nei chu a nihlawhthlak tak zet tih sawiin, LADC-in kum sawmnga a tling ta chu lawmawm a tih thu a sawi a. LADC lo pian chhuah dan tar langin, Lai hnamin district council a neih theih nana hma latu leh sulsutute inpekna leh thawh rimna fakin, anmahni zahna chibai a buk a. LADC chu a kum tam zawng chauhva ṭhang lo va, kawng tinrengah hmasawnna a awm theih nan hnam ziarang, ṭawng leh nunphung vawn him leh chawi nun zel te; ram chhunga khuarel thil hrang hrang - ramngaw, nungcha, lui leh tlang ven him leh humhalh te; ruihhlo leh nun dan ṭha lo laka ram ven him te; zirna ngaih pawimawh te; dikna leh rinawmna nunpui te chu thil pawimawh tak a nih thu a sawi a. LADC chu a sang zawnga a ṭhan zel theih nan ram hruaitute, LADC hnuaia thawkte leh ram mipuite chu inpumkhatna ṭha tak vawng nung zel turin a chah a ni.

He huna khual zahawm, Mara Autonomous District Council (MADC)-a Deputy Chief Executive Member Pu HC Lalmalsawma Zasai chuan MADC ai awhin LADC Golden Jubilee lawmpuina thuziak chu LADC Chief Executive Member Pu V. Zirsanga hnenah hlanin, chibai bukna, lawmpuina leh fuihna thu a sawi nghal a ni.

LADC Golden Jubilee lawmna ni khatnaah hian Lairam Isua Krista Baptist Kohhran-a General Secretary Rev. B. Zazawna Lai chuan hunserh a hmang a. LADC-a Art & Culture changtu Executive Member Pu BN Thangpuia'n inlawmna thu sawiin, Executive Secretary Pu H. Lalruatkima'n report a pe a. CEM Pu V. Zirsanga chuan Golden Jubilee souvenir magazine tlangzarhin, golden jubilee puala LADC sulsutute leh hotu hluite chawimawina thuziak buatsaih chu a dawngtute kutah a hlan nghal a ni.

He hunah hian LADC Golden Jubilee puala cake zaina leh balloon thlawh chhuahtirna hun hman a ni bawk a. Celebration Programme Committee Secretary Pu Joseph Lalhmingthanga Chinzah kaihhruaiin LADC Golden Jubilee lawmna puala intihsiakna buatsaih hrang hrang - Branch YLA hnam lam (ruakhatlak) intihsiakna, Branch YLA Zaipawl intihsiakna, Middle School Chawnglaizawn lam intihsiakna, Inter-Middle School Spelling Bee, LADC inter-department futsal competition, bawhhla intihsiakna, volleyball leh football tournament lawmman te sem a ni a. Lai Women Association (LWA) te'n hnam inthuamna chi hrang hrang entirna (costume parade) buatsaihin, Middle School zirlaite, East Lairam leh Bru Cultural Troupe te'n hnam lam chi hrang hrang an entir a. Maxy Lalhmangaihtluangi hnen aṭangin recitation ngaihthlak niin, LIKBK Assembly Choir, Central YLA Choir leh zaithiam chi hrang hrang zai ngaihthlak a ni bawk a. Tlai lamah concert hun hman chhunzawm a ni bawk.

LADC hi kum 1953-a din Pawi-Lakher Regional Council (PLRC)-in a hrin niin, kum 1972 April ni 29 khan din a ni a. Tunah hian elected member 25 leh nominated member 4, an vaiin Member of District Council (MDC) 29 an awm a. A huam chhung ram zau zawng hi square kilometre 1,870.75 niin, village council 97 a awm a. Chhungkaw 21,358 awmin, mihring cheng zat hi mi 1,03,456 vel a ni.

LADC Golden Jubilee lawmna hi April ni 29, 2022 khan hawn niin, kum 2022 chhungin a lawmna chi hrang hrang kalpui a ni a. Vawiina a lawmna pui buatsaihah hian LADC-a member ni lai leh member hluite leh an chhungte, MADC-a member-te, LADC officer leh staff-te, state leh central department official-te, political party, pawl leh kohhran hrang hrang ai awhte, zirlai naupangte leh mipui ṭhahnem tak an kal khawm a. Golden Jubilee lawmna hi naktukah CYLA Playground-ah hman chhunzawm a ni ang.

Attachment

  • Loading attachment...