1780/2022-2023
Mimkut thla ni 1, 2022: North Eastern Council (NEC) sum hmanga Mizoram Sawrkar Art & Culture Department kal tlanga Lawngtlai-III-a Lai Cultural Centre-cum-Auditorium sak thar chu vawiin khan Lawngtlai East Bialtu MLA, Agriculture Development Board Vice Chairman Pu H. Biakzaua chuan a hawng.

Pu H. Biakzaua chuan Lai Cultural Centre-cum-Auditorium hawn theih a ni ta chu Pathian hruaina leh tha thawhtute inpekna vang a nih thu sawiin, lawm thu a sawi a. A tira hma la hmasatu Bialtu MLA hlui Pu H. Zothangliana te, DPR siamtu Lushai Engineers te, Lawngtlai-III Branch YLA, VC leh mimal ṭhahnem ngai tak takte hma lakna faka lawm thu sawiin, a hlawhtlin nana theih tawp chhuahpuia tun dinhmun thlentu Mizoram Sawrkar fawng vuantute, Art & Culture Department official-te leh Lai Autonomous District Council hotute chungah lawm thu a sawi bawk. LCCA hawn tak chu Cultural Centre a nih ang ngeia hnam ziarang humhalhna leh chawi nun nana ṭangkai taka hman a nih a beisei thu leh kawng hrang hranga Lawngtlai District ṭhalaite rahbi thar chuan kaitirtu a nih a beisei thu a sawi a. Sum tam tak senga ram leh hnam tana ro tling ni tura din a nih angin, a enkawltu leh hmangtu turte pawh uluk leh dimdawih taka enkawl leh hmang turin a chah a ni.

LCCA hawnna hun hi Mizoram Sawrkara Art & Culture Department Director Pu R. Hmingthanzuala'n kaihruaiin, kal khawmte lawmna thu a sawi a. Rev. Vanlalchhuanga'n hunserh hmangin, A&C Department-a Junior Engineer Pu RL Lalremruata hnen aṭangin technical report ngaihthlak a ni a. Lawngtlai-III Bialtu MDC Pu T. Lalengmuana, A&C Joint Secretary Pu PC Lalrindika leh Lawngtlai-III Branch YLA President Pu MC Lallungrualpuia te hnen aṭangin thu sawi ngaihthlak niin, a duh apiang tana thu sawina hun hawn a nih bakah, zaithiam zai te ngaihthlak a ni a. A&C Deputy Director Pu K. Lalruala'n lawm thu sawiin hun a khar a ni.

Vawiina LCCA hawnnaah hian LADC-a Chief Executive Member Pu V. Zirsanga, Chairman Pu VL Hmuaka leh Executive Member leh MDC-te, Lawngtlai Bawrhsap Pu Amol Srivastava leh state leh LADC hnuaia official-te, Art & Culture Department official-te, political party hruaitu leh tlawmngai pawl ai awhte, chanchinbu mite leh veng chhung mipuite an kal khawm a ni.

LCCA hi NEC aṭanga sum hmuh hmangin ₹ nuai 466.62 senga sak a ni a. A hna hi Mizoram Sawrkar Art & Culture Department-in enkawlin, Lushai Engineers, Ramhlun, Aizawl te'n a sak hna an thawk a. February 15, 2018 khan hna ṭan niin, April 20, 2022 khan thawh zawh a ni. A building hi chhawng thum niin, a kawng ân (ground floor) hi square metre 147.68-a zau a ni a; a chhawng laita (1st floor) hi square metre 327.50-a zau niin, exhibition hall, conference room, pre-function lobby leh toilet te dah a ni a; a chhawng chung ber (2nd floor) hi square metre 575.11-a zau niin, hall leh seating gallery atana ruahman a ni a, ladies & gents toilet dah tel a ni bawk.

Art & Culture Department hotute sawi danin, Department kal tlang hian Aizawl lamah Vaivakawnah leh Bawngkawnah te Cultural Centre-cum-Auditorium hi sak a ni tawh a, tuna Lawngtlai-III-a mi hi Mizorama a pathumna a ni. LCCA chungchangah hian Department leh Lawngtlai-III Branch YLA te'n inremsiamna (agreement) ziakin, Lawngtlai-III Branch YLA te hian an enkawl zui dawn a ni.

Attachment

  • Loading attachment...