1781/2022-2023
Champhai, the 1st September, 2022: National Social Assistance Programme (NSAP) kaltlanga BPL chhungkua ami eizawngtu ber an thiha tanpuina, National Family Benefit Scheme (NFBS) hnuaia hamthatna dawng tur thlangtu District Level Committee on National Social Assistance Programme - National Family Benefit Scheme chu vawiin chawhma khan an Chairman, Pu James Lalrinchhana, District Bawrhsap hovin DC Conference Hall-ah an thukhawm a, dilna lutte zirchiangin hamthatna dawng tur an thlang a ni.

Pu James Lalrinchhana chuan Sawrkarin khua leh tuite hamthatna tur scheme tha tak tak a siam thin thu sawiin, a dawngtu tur mipuiten an hmelhriat tam a, an chanpualte an hmuh ngei theih nana hmalak a tul a ni, a ti a. Member-te chu scheme pawimawh mipuite hrilhhriat leh zirtir kawngah theihtawp chhuah turin a chah a ni.

Member Secretary Pi F.Lalngaihawmi, District Social Welfare Officer, Aizawl East chuan kalkhawmte lawmna thu sawiin, NFBS hamthatna dawng tura dilna lut leh tehfungte a sawifiah a. National Social Assistance Programme chungchang leh hemi kaltlanga scheme buaipui 4 te a sawifiah nghal bawk.

Vawiina District Level Committee on National Social Assistance Programme - National Family Benefit Scheme thukhawm chuan dilna lut hrang hrangte chu tehfung nena enmilin a zirchiang a. Champhai District atanga hamthatna dawng tur thlan theih bituk zat chu mi 27 niin, dilna lut 33 a awm a. Uluk taka zirchianna neih a nih hnuah mi 26 te chu tehfung zulzuia thlan an ni a, heng bakah hian thuneitu sang zawkah sawifiahna siama dilna siam sak tur 1 rawt a ni bawk.

He hunah hian National Social Assistance Programme hnuaia scheme hrang hrangte zirchianna neih a ni a. Hamthatna dawng thei turten an chanvo an hmuh ngei theih nan chak zawka hmalak ni se tih niin, scheme hrang hrangte dilna hun hawn a nih veleh zau zawka puanzar thin ni se, hemi atan hian Media, VC, YMA leh MHIP te kaltlanga hmalak ni se tih a ni a. Sawrkar laipui atanga fund dawn a nih dante tarlan niin, sanction awm leh veleh thutkhawm koh leh ni se tih a ni a. Dil thei chin leh dil dan kalphungte inhrilhhriatna zau zawk neih dan turte bakah, Champhai District-in tangkai taka heng scheme-te hi a chhawr theih dan turte pawh sawiho a ni bawk.

National Social Assistance Programme (NSAP) hnuaia scheme hrang hrang zinga 4 te hi Sawrkar laipui leh Mizoram Sawrkar tangkawpin a kalpui mek a. Tar pension kan tih mai Indira Gandhi National Old Age Pension Scheme (IGNOAPS) hnuaiah BPL chhungkua ami kum 60 chin chunglamte pension pek thin an ni a. Hmeithai Pension ti a hriat Indira Gandhi National Widow Pension Scheme (IGNWPS) hnuaiah hian hmeithai, BPL chhungkua ami kum 40 leh 79 inkarte hnenah pension pek thin a ni a. Indira Gandhi National Disability Pension Scheme (IGNDPS) kaltlangin rualbanlo, BPL chhungkua ami kum 18 leh 79 inkar, rualbanlohna za zela 80 (80%) neite hnenah pension pek thin a ni bawk.

Heng bakah hian National Family Benefit Scheme (NFBS) hnuaiah BPL chhungkua ami chhungkaw eizawngtu ber a boralin, vawikhat atan tanpuina Rs. 20,000/- pek thin a ni a. Chhawmdawlna hi chenpui la damte hnenah, khawtlang hruaitute nena tangkawpin chhungkaw lu ber leh eizawngtu ber a ni tih hriatpui hnuah pek thin a ni a. Chhungkuaa eizawngtu ber chu hmeichhia emaw mipa emaw pawh nise kum 18 leh kum 60 inkar a nih laia boral a nih chuan chhawmdawlna hi pek theih a ni.

He hunah hian Pu B.Lalchhawntluanga, PD, DRDA; Pi Esther Leihang, DLAO; Pu Lalrinmuana, DPO (WCD) leh Member dangte an tel a ni.