No.5385/2020-2021

Kolasib 24th September 2020: Nimin chawhnu khan Kolasib District-a Thingdawl Agriculture Farm chhunga changtlung leh chak zawk a hman theih tur a thawhthat, 'State Biological Control Laboratory' chu Pu Rohmingthanga Colney, Director, Agriculture Department (Crop Husbandry) in a hawng.

Agriculture Director Pu Rohmingthanga chuan State Biological Laboratory chak zawk leh huam zau zawk a hman leh theih tur a hawn a ni leh ta chu lawmawm a tih thu sawiin sik leh sa inthlak danglamna thleng mek avanga loneituten harsatna an hmachhawn thinah nasa taka a puih ngei a beisei thu a sawi a ni. Pu Rohmingthanga chuan Biological Control Laboratory hmang hian ram leilung leh mihring tana him ni bawk hmangin thlai eichhetute dolet an nih tur thu a sawi a, Thingdawl Biological Control Laboratory chu Mizoram puma loneituten tangkai taka an hman theih nan duhsakna a hlan bawk a ni.

He hun hi Pu J. Rothanga, DAO in kaihruaiin, Pu Mana Samte, Farm Manager in technical report a pe a, Pu B. Ramnunsanga, Subject Matter Specialist leh Agriculture Department, Kolasiba thawktute an tel bawk a ni.

He Laboratory hi 1998 khan Neihbawih Farm, Sihphirah Sawrkar laipui hmalaknaa din a ni a, 2011 khan Thingdawl Agriculture Farm chhungah hian suan thlak a ni leh ta a ni. He Laboratory-ah hian tunlai thiamna changkang tak zulzuiin Biological Control-na atana hmanrua pawimawh Bio-agents siam chhuah thin a ni a. Chumi atan chuan Buh leh Fu eichhetu rannung (Steam Borer, Leaf Roller, etc.) te tichhe turin an hmelma rannung tho Trichogramma siam chhuakin Trichogramma te hi thlai hmunah chhuah an ni a, chu chuan him tak leh awlsam takin Buh leh Fu eichhetu a suat thin a ni.

Kum 2019 - 2020 khan RKVY atangin he Centre siam thatna tur hi hmuh a ni. Thingdawl Agriculture Farm ah hian Vermicomposting leh Oilpalm demostration-te kalpui a ni a, a tul angin training-te neih thin a ni bawk a ni.