Ni 8 & 9 September, 2015 khan Director of Agriculture(Crop Husbandry) Dr.C.Lalzarliana hovin Lunglei DAO Pu J.Rothanga leh department officials dangten Lunglei District-a Lungsen leh Tlabung biala Agriculture Department hmalakna hrang hrangte an tlawh.

Ni 8.9.2015 khan Lungsen rama Saisih leh Khawthlir zaua Oil Palm Compact Area tlawhin Saisih zauah Farmers' Training an hmanpui nghal a. Saisih zau hi Lungsen hmar lam 8km-a hla a awm a ni a, chhungkaw 26-in 28 hectares-a zau tlangram lo neiin Oil Palm a ching khat vek a, tlangram buh leh Oil Palm te hi duhthusamin a tha a ni. Agriculture Director Dr,C.Lalzarlina chuan loneitute fuihin Oil Palm hi kum 4 atangin a rah tan a, meikang a haw lova, tam hri a vei hriat a ni lova, lei duhtu an awm nghal reng bawk avangin loneitute tan chin manhla tak a ni, a ti a. He zaua loneitute tan huan samna khawl (brush cutter) 5 leh Sprayer 3 a pe a. Saisih ang thova Oil Palm Compact Area dang 2 - Khawthlir (Lungsen ram) leh Leuhloh tlang (Tlabung Zodin) ami te a tlawh bawk.

Agriculture Director Dr.C.Lalzarliana chuan ni 9.9.2015 khan RKVY sum cheng nuai 15 hmanga sak SDAO Office, Tlabung-a mi chu a hawng nghal a. Pu Zara chuan Tlabung hi Agriculture tan hmun pawimawh a ni reng dawn avangin sorkarin office thar a rawn sa a, mipuite pawhin an khaw boruak mila leilet leh oil palm hmangin eizawn thiam a ngai a ni, a ti.

SDAO Office thar hawnnaah Pu R.K. Nithanga, Dy. Director (Oil Palm), Pu Tlangtinmawia (Technical Officer to Director), Pu J.Rothanga, DAO Lunglei bakah SDO(C) Tlabung, SDPO Tlabung, DFO Tlabung leh khawtlang hruaitute Agriculture Director hi an tawiawm a ni.