Chief Minister Pu Lal Thanhawla chuan vawiin khan Aijal Club-ah ni hnih chhung awh tur Regional Review Meeting for North Eastern Region on National Programme for Prevention and Control of Cancer, Diabetes, Cardiovascular Diseases and Stroke (NPCDCS) a hawng.

Chief Minister chuan Hmarchhak State hrang hrang atanga aiawh lokalte chu lo lawmin, NPCDCS Review Meeting Aizawl-ah nghah a ni chu lawmthu a sawi a. Inkaichhawn loh chi, Non Communicable Diseases (NCD) natna te hi Mizoramah chuan hriat tam la nilo mahse, vantlang hriselna lam ngaihtuahna kawngah a pawimawh hle a ni a ti a. Hetih lai hian cancer, zunthlum leh BP sang tihte hi kan hre hle a, a vei pawh kan tam chho hle niin a hriat a, a vanduaithlak hle a ni a ti a. Chuvangin heng natna, ngawi renga nunna suattu chungchang hi mipui vantlang lamah inhrilhhriat a, inzirtirna lam kan uar a tul hle a ni a ti.

Chief Minister chuan Mizoram chu cancer khawpui ang maia hriat kan ni hi a lungchhiat thlak a. Zunthlum leh BP Sang (Hypertension) te pawhin pun lam an pan hi a lungngaihthlak hle a ni a ti a. Mipui kan hrisel loh chuan hmasawnna a awm theilo a ni tiin, heng natna te hi chona lian tak a ni a ti a. Keini mi tlemte, maktaduai khat awrh tan chuan tumruhna nen kan do kiang thei ang tih a rinawm a ni a ti. Chief Minister chuan vaihlo leh a kaihhnawih do hi Mizoramah chuan tha thlah lovin kan kalpui a ni tiin, Mizoram State Tobacco Control Society in chak takin hma a la reng a ni a ti a. A hlawhtlinna chak tawklo mahse, hlawhtlinna kawl a eng hle a ni a ti.

Chief Minister chuan hmarchhak bial mipuite hriselna hi central sorkarin ngaihpawimawh takah nei tura ngen nghalin, abikin Mizoram hi hmun kilkhawra awm anih avangin ngaihpawimawh bikah neih se tiin a chah bawk a ni.

NCD atan hian National Programme 9 awmin, chung zingah chuan NPCDCS hi a pawimawh ber te zinga mi a ni a, a chhan chu khawvela thihna zinga tam ber chu NCD vang a ni. NPCDCS hi kum 2008 khan kalpui tan a ni a, kum 2010 October thla atang khan India ram district 100 ah beihpui thlak a ni a. Mizoramah chuan nikum 2014 March thla atang khan Aizawl, Lunglei, Saiha leh Champhai ah te kalpui a ni a, Civil Hospital tinah NCD Cell hawn a ni.

Review Meetinga tel tur hian hmarchhak state 8 aiawhte tel kimin an vaiin mi 16 an ni a.Central sorkar Ministry of H&FW, NCD Cell atanga aiawh lo tel tur erawh thlawhtheihna lam remchan loh vangin an rawn tel thei lova, West Bengal aiawh lo tel tur pawh a tel thei lo bawk a ni.

Hawnna programme ah hian Pu Lalhmingthanga, IAS, Health Secretary in lawmna thuchah a sawi a. Principal Director Dr.K.Ropari leh Health Director Dr.Lalbiak Kima ten thusawi bawkin, Dr. Eric Zomawia’n powerpoint hmangin cancer pattern in North East tih a hrilhfiah bawk a ni. Chawhnu lamah state 6 in presentation neiin, naktukah chhunzawm a ni ang.