Vawiin chawhnu dar 1:00 khan Serchhip DC Meeting Room-ah Serchhip District Anti-Tobacco Squad chu an Chairman Serchhip Bawrhsap Pu VL Remliana, MCS hovin an thukhawm a, naktuk September ni 11, 2015 a “Mizoram Anti-Tobacco Day Vawi 2-na” hman dan tur an rel.

Sawrkar thuchhuak angin naktuka “Mizoram Anti-Tobacco Day Vawi 2-na” hi Sawrkar pisa tinah anmahni remchan dan anga hman tur a ni a, pawisa a hranpa a sanction a awm loh avangin anmahni senso a intum tur a ni a, an hun hman dan report erawh Mizoram State Tobacco Control Society ah ah thehluh tur a ni ang. Hei bakah hian Serchhip District Anti-Tobacco Squad chuan naktuk zing hian he ni pual “Squad Drive” neih a tum a, hei bakah hian vaihlo kaihhnawih zawrh leh hman chungchang inzirtirna atan TV Scroll advertisement tihchhuah an rel bawk, Serchhip-a chanchinbu chhuak te pawh editorial ah vaihlo leh a kaihhnawih chungchang inzirtirna hawi zawng ziak turin chanchinbu editor te an ngen bawk a ni.

Nikum a Mizoram Anti-Tobacco Day Vawi 1-na hman anih (September ni 11, 2014) atanga vawiin (September ni 10, 2015) thleng hian Serchhip District a khaw hrang hrangah “Squad Drive” vawi 19 neih tawh niin Dan bawhchhia mi 150 man an ni tawh a, an pawisa chawitir zat hi Rs. 6210/- a ni a, Dawr 3 man ani tawh bawk.