Nimin khan Kolasib District-a Chemphai leiletah Agriculture Director Dr. C. Lalzarliana chuan loneitute tana buatsaih Farmers Field School a hmanpui.

He Farmers Field School hi National Food Security Mission hnuaia District Agriculture Officer Pu Lalthansiama’n a buatsaih a ni a, he Field School-ah hian leilet enkawltu hnam dang 70 bakah Agriculture Department Officer-te leh Staff te an tel. Training-ah hian SRI hmanga buh chin dan, Pu N. Arun Kumar Singh, SMS, KVK, Kolasib-in zirtirna a pe a, Improved Package of Practices hmanga buh chin dan Pu C. Lalthlamuana, SDAO, Kolasib-in a zirtir bakah buh tichhetu rannung laka inven dan Pu Joseph Lalnuntluanga, AEO, Kolasib-in a zirtir bawk.

Agriculture Director, Dr. C. Lalzarliana chuan Field School chu Mizoramah hlawk zawka buh thar a nih theih nana din a nih angin Chemphai leilet enkawltute chu an thil zirte hmang tangkai tur leh Sorkar pawhin an thawh mil tawk anga tanpuina a pek zel thu te a hrilh a. Zirtirna hun hman zawh a nih hnu hian SRI hmanga buh phun dan a takin entirna neih nghal a ni. Hetianga zirtirna hi leilet enkawltute hian an hlawkpui hle a, nikum lamah pawh an buh thar a leta pung tate pawh an awm nual a ni.