1555/2026-2027

Dated Aizawl, the 29th July 2026: Vawiin khan Directorate of Agriculture & Farmers’ Welfare Conference Hall-ah district 10 hnena nihawi chi sem tur vailiamna hun (flagging-off programme) leh favanga uar zawka nihawi ching tura campaign kick-off neih a ni a.   Agriculture & Farmers’ Welfare Dept. Minister Pu P.C. Vanlalruata chuan khuallian niin he hun hi a hmanpui a, nihawi chi sem turte chu a vailiam.

Minister chuan he nihawi chi sem chhuah campaign kick-off a hmanpui thei chu lawmawm a tih thu sawiin, department-a thawktute thawhrimna leh inpekna chu loneitute’n hma an sawnpui ngei a beisei thu a sawi a. India ramah edible oil demand a san thu sawiin, kum 2024 chhung ringawt pawh khan demand chu metric ton maktaduai 25 aia a tam thu leh India ramin metric ton maktaduai 12.1 lek tharchhuakin, ram pumpui mamawh chu za zela 40 bak an phuhruk loh thu leh ram dang atangin India ramin edible oil a mamawh ang metric ton maktaduai 15.6 (60% vel) chu an chawk luh thin thu a sawi. India ram mihringte oil mamawhna a sang a, kum khata chawh rualin mi pakhat zelin (per capita edible oil consumption) oil kg 18 atanga 19 an mawmawh thin, a ti a. Mizoram sawrkar pawhin he central scheme (National Mission on Edible Oils) chu hmang tangkaiin loneitute intodelh zelna turin hma a lak zel thu a sawi a. Loneitute chuan sawhthing chin piah lamah nihawi chin lama hma laa, an sum lakluh pawh nasa taka a pun ngei a beisei thu leh, an sawhthing chin tan pawh a that thu sawiin Pu P.C. Vanlalruata chuan kalkhawmte chu nihawi uar taka ching zel turin a sawm bawk a ni.

Pu P.C Vanlalruata chuan National Mission on Edible Oils (NMEO) scheme hnuaiah Mizoram chuan hma an sawn zel a beisei thu a sawi a. Central sawrkar hmalakna chu Mizoram pawhin hmasawnna atan a hman zel thu sawiin Mizoram Agricultural Marketing Board kaihhruaina hnuaiah National Agricultural Cooperative Marketing Federation of India (NAFED) in nihawi chi te chu direct-a a lei dawn thu leh kg 1 chu cheng 83.43 zela a lei vek tur thu a sawi bawk. Minister chuan he mission hi hlawhtling taka kalpui a nih theih nan leh loneituten an hlawkpui ngei theihna turin duhsakna a hlan thu a sawi a ni.

He programme hi Agriculture & Farmers’ Welfare Department Secretary Pi Ramdinliani chuan chairperson niin a kaihruai a, Deputy Director (Crops) Pi Vanlalngaii atang technical report ngaihthlak niin, Khawbung Block Champhai District Gram Sevak Pu Lalramenga atang sawhthing leh nihawi chin kawp thatna chungchang ngaihthlak a ni a.  Agriculture & Farmers’ Welfare Department Director Pi Vanramthangi chuan he hun hi lawmthu sawinain a khar a ni.