1554/2026-2027

Dated New Delhi, 28 July 2026 : Nimin khan Prof. Lalnilawma, Disaster Management & Rehabilitation Department changtu Minister chu Ministry of Home Affairs hotute nen inkawmin, Mizorama Chhiatna hrang hrang thleng thinte laka invendan tur  (Disaster Mitigation Initiatives) leh a kaihhnawih hmalakna kalpui mekte thlirhona ( high-level review meeting) an nei a. Minister hi Pu Sushil Singh, Disaster Management & Rehabilitation Department Secretary chuan a tawiawm a ni.

Meeting-ah hian Mizoram tana Disaster Mitigation Project Sawrkar laipuiin a pawmpui tawhte a rang thei ang bera hma lak nghal dan turte, Project kalpuitu Institution-te thuam chak dan tur leh Project kalpui mekte chak leh zuala kalpui dan turte relho niin, Mizoram chu Chhiatna thleng thin chi hrang hrang laka invendan leh chhiatna lo thlen thulha hma lak kawngah India hmar chhaka State dangte tihhmuhtu ni thei tura hmalak dan turte an sawiho a ni.

Meeting-ah hian Mizorama kalpui mek National Landslide Risk Mitigation Programme chungchang chu thlirho niin, Ministry of Home Affairs leh Mizoram Sawrkar chuan Mizorama leilung pianhmang mumal zawka thliarfelna (Digital Elevation Model)-te, ram hmelhmang zirchianna (slope investigation) leh technical thil Project kalpuina tura tul angte tihhlawhtlin kawngah Geological Survey of India (GSI) leh Mizorama PWD Department-te chu thawhhona  tha leh zual nei tura hmalakte rel a ni a.

Meeting-ah hian Project hrang hrang: Kangmei chhuak thei laka invendan (Forest-fire Management)-te, Lirnghing lo thlen thulha invendan te leh khawtlang mipuite nen tangruala chhiatna lo thleng thei laka inveng tura hmalakna kalpui mekte pawh thlirho nghal a ni a. Chhiatna thleng thinte laka inven kawngah, a tam thei ang ber mipui vantlang an tel ve chu ngaihpawimawh ber tur pakhat a nih thu tarlan niin, Sawrkar chuan hemi kaihhnawiha hmalakna atan hian cheng Vaibelchhe sawm a dah hran tawh thu  pawh tarlan  a ni bawk.

Ministry of Home Affairs chuan Mizoram sawrkar chu tun hnaia Union Minister of Home Affairs-in State leh Union Territories zawng zawngte hnena a chah Disaster Resilience Agenda 10-te tihhlawhtlin kawngah, Sawrkar laipui nen tangruala chak taka hma lakpui turin a sawm a. Hemi atan hian State Disaster Management Authority (SDMA)- leh District Disaster Management Authorities (DDMA)-te thuam chak bakah State chhung hmun hrang hranga chhiatna hrang hrang kaihhnawiha hmalatu theuhte thhuam chakte chu a pawimawh hle tih tarlangin, Sawrkar Laipui chu heng hmalaknaahte hian State sawrkar thlawp zel turin a inpeih reng thute tarlan a ni bawk.

Nimina sawihonaah hian khuarel chhiatna chi hrang hrang kaihhnawiha Mizoram bil dinhmun pawh thlirho niin, Leimin, Lungtla leh Khawpuia mihring inbeng muk lutuk te leh Seismic Zone V-a a awm vanga lirnghing laka Mizoram a him loh zualdan te chu sawiho a ni a. Hemi chungchangah hian Prof. Lalnilawma chuan Mizoram Sawrkarin ruahmanna felfai tak nena Peace City din tura hmathlir a neihdan chu Sawrkar laipui hotute hmaah hian sawifiahin, Peace City chuan hmasawnna insawr zim lutuk turte a ven bakah rualkhai zawka Mizoram hmasawnna a thlenin, Khawpui thandan mumal zawk pawh a hrin chhuah ngei theih a beiseiawm hle thu a sawi a. Ministry lam pawhin he hmathlir hi Mizoram tan a tha dawn hlea an hriat thu an tarlang ve bawk a ni.

Nimin Meeting-ah hian kumin chawhnu lam a, Mizorama North-East Disaster Management Ministers' Conclave nei tura rawtna lut pawh thlirho nghal a ni a. Rawtna ang chuan He intawhkhawmah hian India Hmarchhak biala State hrang hrang Disaster Management changtu Minister-te chu thawhhona tha zawk an neih theihna turte, anmahni state theuhva chhiatna hrang hrangte tangruala hmachhawn tlandan tur ruahmanna tha zawk siamte leh Finance Commission-in India hmar chhaka state-te tan Khuarel Chhiatna laka invenna tur ruahmanna a siam thlirhona te neih theih beisei a ni.

Nimin Meeting hi a hlawhtling thawkhat hle a. Ministry of Home Affairs, National Disaster Management Authority leh Mizoram Sawrkarte chuan Mizoram chu Chhiatna hrang hrang thleng thei laka invenna kawngahte, Disaster Mitigation Project hrang hrangte kalpui kawngah leh Mipui Vantlang zirtir kawngahte leh India rampuma State dangte kawhhmuhtu ni thei tura hmala turin theihtawp chhuah tlan an tum tih an tarlang a ni.

Minister hi DM&R Secretary Pu Sushil Singh bakah New Delhi Mizoram House Addl Resident Commissioner Pu Alexander V Chongthu ten an tawiawm a ni