1553/2026-2027

Lawngtlai  29th July 2026: Vawiin khan Lawngtlai District AIDS Prevention & Control Committee (DAPCC) leh Mizoram State AIDS Control Society (MSACS) hmalaknain District Level Red Ribbon Quiz Competition 2026  neih a ni a. Dr. Lorrain Lalpekliana Chinzah, Adviser to Chief Minister (H&FW, A&FW) leh Lawngtlai East bialtu MLA nibawk chuan Khuallian nia hmanpuiin, Pu Donny Lalruatsanga, Bawrhsap leh Chairman, DAPCC nibawk chuan hun a kaihruai.

Dr. Lorrain Lalpekliana Chinzah chuan  'Quiz Competition'  buatsaihtute, Competition - a lo tel School- te leh kalkhawmte hnena lawmthu sawiin, quiz competition- buatsaih chuan HIV/ AIDS dona kawnga rah tha  a chhuah ngei a beisei thu a tarlang a. HIV/ AIDS chungchangah inzirtirna tam tak neih tawh ni mahse, India ramah population anga chhutin HIV/ AIDS kai tamna ber State kan ni mek a, hei hian  tan lak nasat a ngaih zia a tichiang hle a ti.HIV/ AIDS kai tamna ber chu mipat hmeichhiatna hman atangin a ni tiin, thalaite leh zirlaite chu nupui pasal neih hmaa mipat hmeichhiatna hmang lo tur leh  drugs laka fihlim tlat tur te; a bik takin zirlaite chu vawiin  programme hmannaa an thil hriat ang angte midangte hnena hrilhchhawngtu  ni turin a chah a. HIV/AIDS darh zel tur veng turin sawrkarin theihtawp a chhuah zel dawn tih tarlangin, MLA chuan  NGOs, Kohhran  leh khawtlang mipuite HIV/AIDS do kawnga thawhpuiah sawmin, intihsiaka tel zirlai naupangte duhsakna a hlan nghal bawk.

Pu Donny Lalruatsanga chuan HIV/ AIDS umbo leh a vei mekte enkawl kawngah District AIDS Prevention & Control Committee (DAPCC) in theihtawp a chhuah mek zel tih a sawi a. HIV / AIDS laka him turin condom hmang that, kawppui pakhat nena rinawm taka awm, syringe inhmantawm loh te chu a pawimawh hle tih tarlangin, hengte hi zawk a pawimawh hle a ti. Bawrhsap chuan HIV/ AIDS do kawnga thawhpuiah Lawngtlai District - mipuite axsawm nghal a ni.

Intihsiakna hi School level- ah neih tawh niin, a titha ten vawiin hian Quiz Master Pu Elvis Lalthangzuala kaihruaiin District huapa  intihsiakna hi an neih chhunzawm a. School- atangin zirlai 2 theuhin intihsiakna hi an bei a, lawmman dawngtuten chu :

Pakhat na :  Lairam Higher Academy of Science

Pahnih na : Ngurnunsangi English School

Pathum na : Govt. Region High  School

Consolation Prize : Downtown English School

He inelnaa pakhatna hian August thlaa 'State Level Red Ribbon Quiz Competition 2026'   Aizawla neih turah Lawngtlai District- aiawhin an tel leh dawn a ni.

Vawiin hun hmannaah hian Pi Ramdinengi, Counsellor, ICTC chuan HIV/ AIDS chungchangah zirtirna a pe a, Dr. C. Lalthawmmawii chuan lawmthu sawiin hun a khar.