3840/2024-2025

Champhai, 16th January 2025: Vawiin khan Champhai District Agricultural Marketing Committee (DAMC) chu Pi Ramdinliani, Special Secretary, Agriculture & Farmers Welfare Department kaihhruaiin DC Conference Hall, Keifangtlangah an ṭhukhawm a. Champhai District chhunga Secondary Collection Centre/ Auction Centre chungchang bakah thlai thar lei tura  hmalakna leh harsatna hrang hrang te an sawiho a ni.

Pi Ramdinliani chuan he huna kalkhawmte chu hun bichilh tak karah sawrkar flagship programme ngaipawimawha an lo kal khawm avangin lawm thu a hrilh a. Mizoram sawrkar chuan kuthnathawktute sum lakluh a let hnih tal a tihpun a tum tih sawiin, December 2024 khan Kolasib leh Mamit-ah buhhum a lei a, February ni 20 aṭangin sawhthing lei ṭan a tum tih a tarlang.

Agriculture & Farmers Welfare Department Secretary chuan Champhai DAMC-in Collection Centre tura an lo ruahman te chu a ṭul anga thawmṭhat leh a viltu tur mumal tak ruat a ṭul tih a sawi a. Kuthnathawktute an buaipuina kawngah society-te chu hlawkna chauh um lo a, kuthnathawktute hmakhua ngai turin a ngen bawk a ni.

He hunah hian Pu F. Lalmalsawma, District Agriculture Officer (DAO) chuan Champhai DAMC hmalak tawhna hrang hrang te report a pe a, thlai thar dahkhawmna atan hmun 15 - Tualcheng,Hnahlan DCSO Godown, New Champhai DCSO Godown, Melbuk, Mualkawi, Sazep, Khuangleng, Khawbung, Leithum, Vanzau, Farkawn, Vaphai, N. Khawbung, LAMPS Godown Ramhrangkawn, New Champhai Cold Storage te ruahman a nih thu a tarlang a ni.

Vawiin ṭhutkhawmah hian Champhai Bawrhsap Pu VL Remliana bakah DAMC member-te an tel a. Champhai DAMC hmalakna, harsatna leh hmachhawp hrang hrang te an sawiho a ni.