Vawiin khan Agriculture Office, Lunglei chuan an office kawtah NLUP 2nd Phase (3rd Installment) leh Custom Hiring Centre Scheme hnuai atanga Tractor semchhuana hun an hmang a. He hun hi Lunglei HPC Vice-Chairman Pu S.Laldingliana-in a hmanpui a; Lunglei DC Pu Ashish Madhaorao More chu khual zahawm a ni bawk.

NLUP tanpuina semchhuahna inkhawm Lunglei DAO Pu J.Rothanga kaihhruaiah Khuallian Pu S.Laldingliana chuan NLUP bakhar sorkar scheme hrang hrang hnuaia tanpuina semchhuah tawhte hian Lunglei District chhungah hmasawnna thar a chhuah ngei a beisei thu a sawi a. Mizoram chu buhfaiah kan intodelh loh avangin state pawn atangin buhfai kan la lut a, chu chu man tlawm zawkin mipuite hnenah hralh chhuah a ni thin a, hei hian sorkar sum tam tak a ti hek a ni tiin buhfaiah intodelh ngei turin tan i la sauh sauh ang u tiin loneitute a chah. mahnia engtikahmah intungding theih tawh loh tur chhungkaw harsate chu sorkarin NLUP tanpuina pein kawng a sial sak a, sorkar thatna dawnsawn thiam chu mipuite mawhphurhna a ni a. Sorkar chuan mipuite laka a thutiam chu a hlen zo mek a, a dawngtu mipuite chuan rinawmna leh taimaknain an chhan let a hun tawh a ni, a ti bawk.

NLUP semna inkhawmah hian NLUP Coordinator Lunglei Pu Zathangliana, AMFU President Pu Joseph H.Thanzuala leh beneficiaries aiawhten thu an sawi bawk a. Lunglei District pumah NLUP dawngtute hi mi 1604 an awma, vawiina NLUP dawng tur hian Lunglei chhehvel Khua/Veng 22 atangin loneitu mi 112 an lo kal khawm a ni. Centre 10 siam niin tunkar chhung hian NLUP hnuaia tanpuina hi semchhuah hman vek tum a ni a; WRC-I thlang ten Rs.39,000/-, WRC-II dawng ten Rs.28,000/-, Fu chungtu ten Rs.28,000/- leh Oil Palm chingtuten Rs.12,000/- theuh an dawng dawn a ni.

Vawiina inkhawm vekah Custom Hiring Centre Scheme hnuai atang Tractor leh a hmanrua dawng tura thlan te - Buarpui, Ramlaitui, S.Vanlaiphai leh Tiperaghat Cluster-te hnenah Khuallian Pu S.Laldingliana chuan a hlan nghal a. Custom Hiring Centre hnuaiah hian kum hmasa lam khan Ngengrual zau, Thingfal-ah Tractor 1 leh a hmanrua te pek an lo ni tawh bawk a ni.