Agriculture Minister Pu R. Lalzirliana chuan Saikhumphaia Border Trade Centre, MGNREGA hnuai atanga Tiau lei dawh (Suspension Bridge) leh Saikhumphai Non-Residential Special Training Centre te chu nimin (16.11.2016) khan a hmunah tlawhin, Saikhumphaia leilet enkawltu FMC (Field Management Committee) ten Buh Vuak Runpui an huaihawt chu a hmanpui bawk. Minister hi Planning Board Vice Chairman Pu H. Liansailova leh ‘E’ Tuipui bialtu MLA, Mizoram Youth Commission Chairman Pu T. Sangkunga ten an tawiawm a ni.

Saikhumphaia Buh Vuak Runpui pual inkhawm buatsaihah Minister Pu R.Lalzirliana chuan Sorkar hmalakna thar, New Economic Development Policy (NEDP) atana Rs. 250 vbc dah atangin agriculture link road siam that nan Rs. 5 vbc dah a nih thu leh, chumi hmang chuan kawng 100 km ang hu siam that theih a nih tur thu a sawi a. MLA leh DAO te'n hma an lak chak chuan link road chhia avanga kumina buh phur chhuak thei lote harsatna hi sutkian anih tawh dawn a ni, a ti.

Agriculture Minister chuan FMC-te tan Tractor hire tur an pek tawhsa chu loneituten an khawpkham lo tih a hmuhpui avangin Tractor pakhat pek belh leh an nih tur thu a sawi a. Tuilakna (Irrigation) lam chu Minor Irrigation-ah fund a tlem thin avangin BADP, MGNREGA leh fund awm theihna dang atang pawha ngaihtuah zui a nih tur thu a sawi bawk.

Nimin a hun hman hi Dr. C. Lalzarliana, Director, Agriculture Department chuan a kaihruaiin, Directorate leh Block atangin Agriculture Officer leh thawktue an tel bak ah Minor Irrigation thawktute an tel bawk.

Saikhumphaiah hian leilet nei chhungkaw 93 an awm mek a, nikum khan buh tin 30,450 thar chhuah ani a. Zau 4 - Hmawngpui, Hlingsi, Sekawt leh Sairang chu hectare 140 a zau a ni a, hectare 101 chu leilet atana siam tawh niin, tuilak theih loh avanga leilet siam theih loh chu hectare 63 a ni a. Hectare 39 chu leilet-a siam theih, la siam loh niin, a vai hian siam theih nise Vaphai kumkhat buh mamawh a phuhru pha thuak dawn a ni.