Vawiin khan Department of Agriculture (Crop Husbandry) chuan Agriculture Committee Room-ah Pu H. Liansailova, Agriculture Minister leh Pu K.S. Thanga, Parliamentary Secretary, Agriculture hovin kum kalta 2011-2012 chhunga Department hmalakna thlirletna leh kum 2012-2013 leh Plan 12-na chhung atana hmachhawp thlirhovin Meeting an nei.

He Meeting Pu T.V. Fambawl, Secretary, Agriculture kaihhruaiah hian Dr. C. Lalzarliana, Director of Agriculture (Crop Husbandry) chuan kum hlui 2011-2012 chhunga Agriculture Department hmalakna Report leh kum 2012-2013 leh Plan 12-na chhunga Department hmalakna tur ruahman a pharh.

Pu K.S. Thanga, Parliamentary Secretary chuan Agriculture Department chu Mizoram hmasawnna thlentu lian tak Department a nih mek tak thu a sawi a, tuna Oil Palm chin mek te hi a puitlina a rah seng theih hunah chuan Agriculture Department hi Mizoram innghahna pui ber a la nih mai tur thu a sawi. District Agriculture Officer te leh Directorate of Agriculture-a Officer te chu fuihin tun aia an theihna (capacity) la hmang tangkai lehzual tur leh inpekna thuk zawk nei tura Sorkarin anmahniah beiseina sang tak a neih thu a tarlan rualin hun rei lote chhunga hmasawnna nasa tak hmuh tur a awm avangin lawmawm a tih thu a tarlang bawk.

Pu H. Liansailova, Agriculture Minister chuan Agriculture hmanga hmasawnna neih chhoh mek chu lawmawm a tih thu sawiin DAO te leh Directorate Level-ah pawh loneitute thiam taka cho-phur an ni a, Department chhungkuaah inrinhlehna emaw induhsakna emaw, pawn lama zualko ching emaw awm lova, inpumkhatna tha tak neih a ni chu lawmawm a tih thu a sawi a. “Buh thar tam kum puan hi a tira thar tam teuh a ni lova, buh thar tam hi Zoram mamawh a ni a, chu chu kan inzirtir mai a ni,” a ti. Agriculture thiamna (Technology) hmanga buh leh bal tam lehzual thar zel turin Target mumal siam hi a tha a, kum 5 lo awm tur atana ruahmanna neih chu a tha a, Department dang pawhin an entawn atana tha a tih thu a sawi bawk.

Minister chuan hmasawnna kawngah harsatna bik a awm pawhin awmze nei zawka sutkian theih a niin hemi atan hian sum mamawh tawk tur dah a ni a, Agriculture hmasawnna chungchangah Central atanga Mizoram rawn tlawhtute pawh an lungawi thu tarlangin, a bikin Oil Palm chin kawnga hmasawnna chungchangah Planning Commission Adviser-in faktlak a tih thu a sawi lang bawk. Plan 11-na chhunga Tlangram Loneih tihtlem kawnga Mizoram hmasawnnaah pawh Central Sorkar an lawmthu sawiin thiamna thar hmanga hun engemaw chen tlangram loneih kalpui a la ngaih tur thu a sawi a, buh leh thlai thar tamin ram Economy hmasawnna a thlen thu a tarlang a. Thlai thar chhuah tam tak neih a nih theih nan thlai chi tha ngaihpawimawh a tul thu leh thiamna thar hman tangkai a pawimawh thu a sawi bawk.

Agriculture Minister chuan Agriculture hmasawnna chungchanga Ethics Committee Report chu lawmawm a tihthu tarlangin Agriculture Department-a thawktute chu tan la zel turin a fuih a, harsatna te pawh in share tawna inpawh taka thawkho turin a fuih a, loneitu harsa tak tak te pawhin Department-a thawktute chunga rinna an nghah tlat thu leh rintlaka thawk zel turin a fuih bawk.

Meeting hi chawhnu lamah Dr. C. Lalzarliana, Director of Agriculture (Crop Husbandry) hovin neih chhunzawm a ni a, Kum 2011-2012 chhunga Department hmalakna leh kum 2012-2013 atana hmachhawp te sawiho chhunzawm a ni.