Vawiin chawhnu dar 2 khan Vodafone Cup 17th Inter Branch YMA Football Tournament 2012 kharna inkhawm chu A.R.Ground ah neih a ni a, Parliamentary Secretary Pu Lal Thanzara’n a hmanpui.

Khuallian Pu Lal Thanzara, Mizoram Football Association (MFA) President ni bawk chuan infiamna tihchangkanna tura sum leh tha seng duh company leh sorkar department te an awm thin chu lawmawm tiin YMA-in Football Tournament a buatsaih thin chu thalaite tan chhenfakawm tak a nih thu a sawi a. YMA chu Mizo hnam nun mawi chhawm nungtu leh kan ram timawitu a ni tiin YMA member zawng zawngte chungah lawmthu a sawi bawk. HPC(D) hmuna Branch YMA thiat tura vauna awm chu pawi a tih thu sawiin Pu Lal Thanzara chuan Mizo hnam phuarkhawmtu YMA huang chhunga tel vek turin a sawm bawk.

Vodafone Cup 17th Inter Branch YMA Football Tournament 2012 kharna inkhawm hi Sports Sub Committee Chairman Pu Lalrochuanga’n a kaihruai a, Central YMA President Pu T.Sangkunga pawhin thu tawi sawiin an mamawh leh tul apiangte Khuallian-in a ngaihtuahsak avangin lawmthu a sawi.

Vodafone Cup 17th Inter Branch YMA Football Tournament 2012 ah hian YMA Branch 132 an tel a, vawiin-a Final Match hi champion lai Armed Veng Branch YMA leh Chamari West Branch YMA ten an khel a ni. Champion Team hian Trophy leh lawmman pawisa fai Rs 50,000 /- an dawng ang a, Runners Up-in Rs 30,000 /- an dawng dawn bawk a ni.