951/2026-2027

Dated Aizawl, the 11 June 2026: Vawiin khan Agriculture & Farmers’ Welfare Minister Pu PC Vanlalruata office Chamber-ah Agriculture & Farmers' Welfare Department chuan Jute Corporation of India, National Jute Board leh Indian Council of Agricultural Research -- Central Research Institute for Jute and Allied Fibers (ICAR-CRIJAF) te nen thawhhona thuthlung (Memorandum of Understanding) an ziak a. Thawhhona thuthlung ziak tur hian NJB aiawhin Pu Sashi Bhushan Singh IRTS, CEO & Secretary leh Dr. Mahadeb Dutta, Joint Director-te rawn telin, JCI aiawhin Pu Sanjay Kumar Panigrahi, Managing Director leh Pu Kalyan Kumar Mazumdar, General Manager (Operations & Marketing) bakah ICAR-CRIJAF aiawh hian Dr. Gouranga Kar, Director te chu an tel a. Mizoram Sawrkar aiawhin Agriculture & Farmers' Welfare Secretary Pi Ramdinliani IAS, Director Pi Vanramthangi te, DAO Lawngtlai, Lunglei, Mamit te leh official pawimawh dangte an tel bawk a ni.

He hunah hian Agriculture & Farmers’ Welfare Department changtu Minister Pu PC Vanlalruata chuan thusawiin, MOU an sign tak chu, NJB, JCI, ICAR-CRIJAF te leh Agriculture Department te tana thawhhona thuthlung pawimawh tak a nih bakah sum lakluh tihpunna tha tak a ni tur chu lawmawm a tih thu sawiin, a hlawhtlin ngei theih nana theihtawp chhuah zui zel turin MOU sign-naa  tel zawng zawngte chu a ngen nghal bawk a ni.

NJB leh JCI te hi Ministry of Textiles, Government of India hnuaia awm niin, Jute chungchanga India rama thuneitu sang ber an ni a, ICAR-CRIJAF hi Ministry of Agriculture & Farmers' Welfare hnuaia awm niin, jute cultivation lama research tihna hmunpui a ni.

NJB hian Jute cultivation atan Jute-iCARE tih project an kalpui mek a, he project hi Mizoram district pathum -- Lunglei, Lawngtlai leh Mamit-ah te kalpui a ni dawn a. JCI chuan farmers te Jute chungchangah inhrilhhriatna (awareness) leh inzirtirna (capacity building) an kalpui ang a, jute thar chhuah te hi Central Sawrkarin jute tana Minimum Support Price an bituk ang zelin farmer te atangin an lei dawn a. Mizoram-ah hlawhtling taka Jute chin a nih theih nan research leh technical input tul angte chu ICAR-CRIJAF hian an lo kalpui ve dawn bawk a ni.

India ramah hian jute mamawhna a san em em laiin, ram dang atangin India chuan a lalut nasa hle a. Hetiang a nih avang hian Central Sawrkar pawhin jute-a kan intodelh theihnan theihtawp a chhuah mek a ni. NJB leh JCI te kaltlang hian Central Sawrkar chuan jute ching tura tul hrang hrang -- a chi (seed) te, a chinna hmanrua leh khawl te leh a sawngbawlna hmanrua te thlengin a thlawnin a rawn tum vek dawn a ni.

India ramah hian kum sawm liam ta chhung khan Jute tana Central Sawrkarin rate a bituk, Minimum Support Price chu a let aia tamin a pung tawh a, hei hian jute demand a sanzia a tichiang hle awm e. Jute bakah hian New Age Fibers an tih, Flax leh Ramie te pawh ching tura hmalak a ni dawn a. Kumin hian Mizoramah chuan, Lunglei District-a Tlabung MPACS te-nen tangkawpin jute cultivation hi kalpui tan mek a ni.