Vawiin khan Agriculture Minister Pu K.S.Thanga hovin Farmers-Scientist inkawmhona Sialsuk-ah neih a ni a. Agriculture Department (Research &Extension) leh District Agricultural Office, Aizawl District bakah Indian Council of Agriculture Research (ICAR), Kolasib tangkawpin an buatsaih a ni.

Agriculture Minister Pu K.S. Thanga chuan thu sawiin programme hman hi Sawrkar laipuiin programme a duan-Doubling Farmers’ Income,  Seed Village leh scheme dangte tihhlawhtlinna a ni tiin intodelhna kawngah taima lehzualin hmalam pan a pawimawh a ni, a ti a. Seed Village Programme, India Council of Agriculture Research (ICAR) leh New Economic Development Policy (NEDP) hnuaia  hnathawh hrang hrang a tarlang a. Kuthnathawktute leh Scientist inkawmhona neih a ni chu lawmawm a tih thu sawiin district dangah pawh tih chhunzawm zel a beisei thu a sawi bawk a ni.

Programme hi tum hnih (2)a then niin chawhma lama training neih chu Agriculture (R&E) Jt. Director Pu R.L.Thanzuala’n a kaihruai a. ICAR leh Agriculture (R&E) atanga Scientist ten thlai chin dan leh enkawl dan an zirtir a. Chawhnu session hi Aizawl District DAO, Pi Zothansangi Sailo in kaihruaiin loneitute buh leh thlai chin chungchanga harsatna leh hmalakna tur te sawihona hun neih a ni.