No118/2021-2022

Aizawl, the 13th April, 2021: Vawin khan Agriculture Minister Pu C. Lalrinsanga chuan FOCUS Project Review Meeting chu a pisa-ah hmanpuiin, Khuallian a ni a. Pu H.Biakzaua, MLA leh Vice Chairman, Agriculture Development Board chu Khualzahawm a ni.

Review meeting hi COVID-19 hri a pun leh tak avang leh Sorkar in SOP thar a siam avangin biakhmuhtheihna (Virtual Mode) hmanga neih a ni a. Agriculture Minister chuan FOCUS hnuaia hmalakna hrang hrang te thlir letna leh hmalakna tha tawk lo laite siam tha turin review meeting neih a tul thin tih sawiin thawktute pawh inrawn tlanga infuih thar fo a tul thu a sawi a. Agriculture Department hnuaia Externally Aided Project zinga pakhat FOCUS Project hi thingtlang loneitute leh ranvulhtute tana hlawk tak leh tangkai taka hman a nih theih nan theih tawp kan chhuah a tul a ni a ti a. FOCUS Project review meeting chu a vawikhat nana hman a nih thu tarlangin Khuallian chuan FOCUS Project chu ram hmasawnna a nih piah lamah environment danglam leh chhe zel veng pah leh ram economy hrut tel hi a ni a ti a. Thawktu, a te ber atanga a lian ber thlengin thil thar tha zawk leh kalphung tha zawk thurawn tur an neih chuan hreh miah loa pe turin a ngen a. Jhum Cultivation chu thlak danglam hret hret a, Sustainable Agricultural Farming hmachawpa a awm theihnan thawktute chu tan la zel turin a fuih bawk a ni.

Khuallian hian Annual Outcome Survey 2020, FOCUS, MIZORAM chu a tlangzarh nghal bawk a ni.

Khualzahawm Pu H.Biakzaua pawhin thu sawiin ei leh bara kan intodelh theihna tura kil hrang hrang atanga loneitute hamthatna tur leh an tharchhuah a pun zel theihna tura hmalak a tul a, chutiang atan chuan FOCUS Projeçt pawh tangkai taka hman a duh thu a sawi a ni.

Review meeting hi Pi Meera Misra, Co-ordinator, IFAD, New Delhi chuan lo telpuiin Mizorama loneitute harsatna sutkianna tura hmalakna te a sawi a. FOCUS, Project District hrang hrang te nen a hman ho niin, District tin ten an mahni hmun atangin Project hmalakna leh hlawhtlinna hrang hrangte a lem nen entirin an tarlang a ni.

FOCUS project hi International Fund for Agriculture (IFAD) leh Mizoram Sawrkar thawhhona Project a ni a, Agricuiture, Horticulture, Animal Husbandary & Veterinary leh Land Resources, Soil & Water Conservation lama hmalaknate a huam a. District 6, Champhai, Kolasib, Serchhip, Mamit, Khawzawl leh Saitual District ah te kalpui mek a ni.

Review meeting hi Pu Rohmingthanga Colney, FOCUS Mission Director leh Director of Agriculture ni bawk chuan a kaihruai a. Pu J.Hmingthanmawia, Agriculture Secretary leh midangte an tel a ni.