No117/2021-2022

Aizawl, 13th April, 2021 : Vawiin chawhma khan Mizoram State Food Commission (MSFC) member-te chuan an chairman thar Pu H.L. Rochungnunga hovin Supply Minister Pu K. Lalrinliana chu a pisa ah an hmu.

Mizoram State Food Commission member-te chu lo lawmin Minister Pu K. Lalrinliana chuan Commission Chairman leh member-te a bikima kan nei thei ta hi a lawmawm takzet a ni, a ti a. National Food Security Act (NFSA), 2013 kalpui a nih dan vila, a tul anga endik hna thawk tur an nih avangin NFSA hrechiangtu, Mizorama kalpui a nih tan tirh a hmalatu ber MSFC Chairman atana ruat a ni chu a thlamuanthlak a tih thu a sawi a, NFSA pawh felfai tak leh entawntlak taka kalpui a nih theihnan thawhhona tha tak an neih a beisei thu a sawi bawk.

MSFC Chairman Pu H.L. Rochungnunga pawhin Minister viak tha tak maiin NFSA in a phut ang ngeia Mizoram State Food Commission a nihna ang taka kal tura hma a la chu lawmawm a tih thu a sawi a, MSFC din chhoh tan a nih dante leh an hmalakna tur pawimawh nia a hriat te a sawi bawk a ni.

He hun hmanpuitu Supply department Secretary Pu Vanlalngaihsaka leh Director Pi Ramdinliani te pawhin NFSA Mizorama kalpui a nih dan vila enpuitu tur MSFC mumal taka din a ni chu a lawmawm tih sawiin, NFSA hnuaia hmalakna kawng hrang hrangah Supply department leh MSFC te tha taka an thawhho an beisei thu an sawi a ni.

Mizoram State Food Commission hi May ni 1, 2018 khan National Food Security Act, 2013 tlawhchhana din niin, Chairman kaihhruaina hnuaiah member panga an awm a ni.

Mizoram State Food Commission Chairman leh member-te chu :
Chairman : Pu H.L. Rochungnunga, Zotlang, Aizawl
Members : 1) Pu R. Lalthakima, Ramhlun South, Aizawl
2) Pi Lalremliani, Mission Veng, Aizawl
3) Pu C. Zasanga, Kanan, Aizawl
4) Pu Vanlalrawna, ITI, Aizawl
5) Pi Vanlalchhuangi, Bungkawn, Aizawl