No116/2021-2022

Mamit 13th April, 2021 : Vawiin khan DC Conference Hall, Mamit-ah Dr. Lalrozama, IAS, District Bawrhsap/ Chairman, District Level Committee on Covid-19 hovin tunhnaia Covid-19 hrileng zual lam pan leh mek laka kan him theih dan tur leh hmachhawn dan tur ngaihtuahin District Level Committee on Covid-19 thutkhawm a ni.

Meeting-ah hian Mamit District chhunga Covid-19 hridanna (Vaccine) pek tawh dan tarlan a ni a. 1st Dose-ah hian mi 5893 pek tawh niin 2nd Dose-ah mi 1855 pek an ni a. Vaccine dawn tawh zawng zawng zat hi Dose 11980 niin Vaccine Balance hi Dose 2810 a nih thu tarlan a ni.

Vawiin thutkhawmah hian Covid-19 darh zel tur ven nan Executive Duty inruat leh nise tih a ni a. Hei bakah hian Covid-19 dona atana Mamit District Bawrhsap-in Order hrang hrang a chhuahte mipuite'n an zawm that lehzual theih nan SP kaihhruaina hnuaiah Police-te chu Duty tura tih an ni. Sorkar Office-a Covid SOP zawm leh zawm lo endiktu tur Inspection Team din anih tawh thu Meeting-ah hian tarlan a ni bawk. VLTF te rualkhai taka an duty theihna tura ruahmanna siam nise tih a nih bakah mipuite pawn chhuak tam lo tur leh zin tam lo tur te, Mask vuah bakah Sorkar inkaihhruaina SOP zawm tha turin Committee chuan mipuite a ngen bawk a ni.

Committee-ah hian Medical Staff leh Frontline Workers kan puih theih dan tha ber chu mipuite'n Sorkarin Covid dona atana inkaihhruaina a siamte thuawih taka zawm anih thu tarlan a ni a. Kan District chhunga Covid Care Centre (CCC) leh Dedicated Covid Health Centre (DCHC) te chu Sorkar phalnain a tul hunah siam leh anih dawn thu tarlan a ni bawk.

Meeting-ah hian Covid patient enkawlna tur ventilator 4 kan neih thu tarlan a ni a. Critical Trained Nurse leh Oxygen Central Line kan neih loh avangin Covid Critical Patient enkawlna lamah harsatna kan tawh theih dawn thu tarlan a ni bawk.

Vawiin thutkhawmah hian SP, CMO, SMO, DVO, DLAO, DMS aiawh, VLTF, tlawmngai pawl leh khawtlang hruaitute bakah thutharthehdarhtute an tel a ni.