District Agriculture Officer’s Office, Serchhip, leh Hmuntha khawtlang hruaitute tangkawp hmalakna in nimin nileng khan Hmuntha khua in “Luithuam Zau” ah khawtlang huap Lo Zawh runpui an nei a, he hun hi Agriculture Minister Pu R.Lalzirliana, Parliamentary Secretary Lt. Col. Z.S. Zuala, Bialtu MLA Er. Lalrinawma leh Agriculture Department hotu ten an hmanpui a ni.

Lo zawh puala inkhawm buatsaihah thusawiin Agriculture Minister chuan Luithuam Zau a loneitute thawhrimna rah hlu tak leh chhuanawm tak mai hmu thei a a awm chu vannei a in tih thu sawiin an khawtlang lungrualna avanga an hnathawh a taka ahmu chu lawmawm a tih thu a sawi a, Lal Isua nen engkim kan tih phawt chuan kan khua leh khawtlangah hlim takin kan awm reng dawn a ni a ti a, Hmuntha khawtlangin an mamawh an thlen chi hrang hrangte pawh a tihhlawhtlintheih chi chu a hmunah tihhlawhtlin sak an nih dan turin a chhang nghal a, tihhlawhtlin harsa tur te pawh a harsatna chhan a hrilhfiah nghal a ni.

Lt. Col. Z.S. Zuala, Parliamentary Secretary for Agriculture Department pawhin thusawiin Agriculture Department leh Hmuntha khaw thawhhona tha leh loneitute taimakna a fak a, Favang Awllen nuam taka hmang tur leh buh leh bal tam tak thar turin duhsakna a hlan a ni.

Thusawitu dang Er. Lalrinawma, Bialtu MLA pawhin Hmuntha khaw mipuite thawhrimna leh taimakna fakin opposition bial an nih leh nih loh thliar lova hnathawk thate chawimawi sak an ni chu chu lawmawm a tih thu sawiin, Department changtu Minister, Parliamentary secretary leh Department hotute lawmthu a hrilh a ni.

Nimin Hmuntha Lo Zawh programme hi chawhma dar 11:00 ah tan a ni a, Khuallian leh sawmbik ten Lo Zawhna hmun an thlen veleh zirlai naupang ten khuallam nen an lo hmuak a, chhangban leh thingpui in a an hahchawlh hnu ah Khuallian hova chemkawm nen thawkchhuakin Pu Dengsiama Lo vatin an zawh sak a; hemi hnu hian Hmuntha khaw thlen hma, Luithuam Zau kawn laiah Lo zawh inkhawm hlimawm tak hman niin zaithiamte nen hlim takin mipuite an chai a, tlaiah Lo Zawh ruai ropui tak kil a ni bawk.

Hmuntha Luithuam Zau ah hian RKVY hnuaia Inproved Jhum Technology hmanga hmalak a ni a, chhungkaw 120 in he Zau ah hian lo an nei a, Agriculture Department in leitha leh hlo thahna bakah an mamawh damdawi chi hrang hrang pe in an tanpui a ni.

Tun dinhmunah Hmuntha khua ah hian chenna In 140 awmin mihring 850 vel an cheng a, Sawrkar enkawl Zirna In pathum –Primary, Middle leh High School awmin Class 1 – 8 zir theihna English Medium School pakhat awm bawkin Anganwadi Centre pathum an nei a, Health Sub-Centre pakhat an nei bawk a ni.

Nimin Hmuntha Lo Zawh hi Serchhip-a Sawrkar Department hrang hrang hotute, khaw thenawm Chhingchhip Venghlun, Chhingchhip Mualpui, Khawbel leh Thentlang Village Council hotuten an chhim a ni.

Attachment

  • Loading attachment...