No.2663/2020-2020

Aizawl, the 2nd July 2020: Nimin khan Pu C. Lalrinsanga, Minister ( Agriculture, Cooperation leh Irrigation and Water Resources) kaihhruaiin a pisaah MLA thenkhat leh Health Department hotuten COVID-19 dona kawnga Lunglei District chhunga hmalakna hrang hrang te sawihovin meeting pawimawh tak an nei.

Meeting kaihruaitu Minister Pu C. Lalrinsanga chuan hripui dona kawnga Lunglei District mipuite tana Health Department hna thawh chu fakawm a ti a. Health Department leh Department hrang hranga thawktute inpekna chu chhuanawm a tih thu a sawi a. Khawtlang, Kohhran leh Task Force te nena thawhhona duhawm tak hnuaiah Lunglei District chhunga Quarantine Centre te hlawhtling taka enkawl a ni chu lawmawm a tih thu a sawi a ni.

Tun dinhmuna Lunglei District-in COVID-19 test-na khawl a neih sa leh hman lai mek bakah hian Chief Minister ruahmanna angin Sawrkarin TrueNAT Quattro, Mini Realtime PCR khawl bun tura ruahmanna a neih mek thu sawiin Pu C.Lalrinsanga chuan Lunglei District mipuite pawh sawrkar hmalakna ngaichang chunga dawhthei taka he hripui dona kawnga Sawrkar thawhpui zel turin a sawm a. Minister chuan, “He hripui dona kawnga Mi thahnemngai tak tak te inpekna kan hmu leh thin hi Mizo nih nawmzia tilangtu a ni” a ti.
“Hun khirh tak kan hmachhawn mekah hian kan do hi thil thar a nih avangin a tu a mah hi experience nei sa kan awm lo va. Thawktute pawh duh anga kan indaih thei lo tih hriain mipuite pawhin dawhthei takin Sawrkar ruahmanna te kan thlawp tha hle a. Tun anga kan tanrual zel chuan he hripui phenah hian malsawmna duhawm tak kan haichhuak thei a ni” tiin Minister chuan meeting-ah hian fuihna thu a sawi.

He meeting-ah hian MLA pahnih Dr. Vanlaltanpuia, Chairman, MYC, Dr. K. Pachhunga, Vice Chairman, Bamboo Development Board bakah Pu H. Lalengmawia, Secretary, H&FW Deptt leh Health Deptt mi pawimawh dangte an tel a. Meeting chuan Lunglei District chhunga COVID-19 dona kawnga hmalakna hrang hrang te sawi hovin ruahmanna tul ang te an buatsaih a ni.

Tarlan tawh angin Minister Pu C. Lalrinsanga, Lunglei West Bialtu MLA hian Lunglei District chhunga COVID dona atana inpe mi pasarih te chu thla thum chhung atan an lawmman tur a tumsak a ni.